EMEGA mobiliza máis de 4,8 millóns de axudas para o fomento do emprego feminino
luns, 17 de xullo do 2023
A
conselleira de Promoción do Emprego e Igualdade, Elena Rivo, o
delegado da Xunta en Ourense, Gabriel Alén, e a secretaria xeral da
Igualdade, Sandra Vázquez, achegaron este luns 17 de xullo máis
detalles sobre o programa EMEGA de fomento do emprendemento feminino,
cuxo prazo de solicitude de axudas estará aberto até o 7 de agosto
e que nesta edición saldarase nunhas 370 axudas grazas a un
orzamento case un 10% superior ao do ano pasado. Rivo compartiu esta
información nunha visita a unha escola infantil e a un taller de
xoias 3D beneficiarios en conxunto de 44.000 euros no marco deste
programa e que cualificou de perfectos exemplos do “talento
feminino”.
Na
estadía en Ourense a conselleira recordou que as axudas EMEGA
“permiten incrementar a presenza feminina no mercado laboral
galego”, o que “suporá un gran avance colectivo e unha maior
prosperidade para Galicia axudando a mulleres emprendedoras e
talentosas”· En concreto, buscan apoiar a posta en marcha, a
mellora e a activación de iniciativas empresariais constituídas por
mulleres.
A
conselleira lembrou que o programa está integrado por catro liñas:
Emprende, con incentivos para a posta en marcha de novas
empresas por parte de mulleres desempregadas e a creación de emprego
feminino estábel por conta propia e allea; Activa, para
favorecer a reactivación e consolidación de proxectos empresariais
impulsados por mulleres ou a implantación de medidas innovadoras
para a mellora da competitividade; ITEF, que pon o foco no
apoio a iniciativas empresariais con carácter innovador, con contido
científico ou de base tecnolóxica promovidas por mulleres; e a liña
Concilia, complementaria das tres anteriores, para axudar
tanto ás mulleres promotoras como ás traballadoras ao seu cargo na
súa conciliación.
En
concreto, a escola infantil Arlequín viuse beneficiada dunha achega
de 17.000 euros da liña Activa co gallo de renovar os materiais
dedicados á educación dos nenos, adquirir equipamento tecnolóxico
e crear unha páxina web que permita unha mellor interacción entre
os pais e a escola, así como para investir en mercadotecnia online.
“Deste xeito, contribúese á consolidación dos postos de traballo
das seis mulleres profesionais coas que conta o negocio, todas con
contrato indefinido”, sinalou a conselleira.
No
caso da empresa de deseño e fabricación de xoias Suagongo, con dous
postos de traballo femininos asociados, unha subvención de 27.000
euros da liña ITEF permitirá dar un pulo a esta iniciativa que
combina a artesanía tradicional coa tecnoloxía 3D.
Para
resultar beneficiarias, as mulleres emprendedoras deben liderar unha
microempresa ou pequena empresa validamente constituída e
domiciliada en Galicia. Entre outros requisitos, deben manter
vinculación laboral co proxecto que, á súa vez, ten que ser viábel
económica, técnica e financeiramente. Á hora de distribuír as
axudas, teranse en conta, entre outros criterios, o emprego feminino
xerado e/ou mantido por conta propia ou allea de carácter
indefinido, a pertenza a sectores económicos nos cales as mulleres
estean infrarrepresentadas, a contribución á integración laboral
de mulleres vítimas de violencia de xénero, con discapacidade ou
desempregadas de longa duración ou se a actividade empresarial está
dedicada á prestación de servizos de conciliación.