EGANET facilita cunha nova ferramenta o día a día dunha asociación
xoves, 17 de marzo do 2011
- Daniel Cerqueiro, Alejandro Lamas e Juan Manuel Méndez durante a presentación en Compostela da nova ferramenta
Ser a primeira das asociacións empresariais
TIC posta en marcha na nosa terra obrígache a facer camiño social, empresarial
e tecnoloxicamente. Así o entende EGANET,
para quen hai unha serie de elementos especialmente vantaxosos para a cidadanía
dentro da Sociedade do Coñecemento que non se poden deixar de lado. Un destes
elementos que EGANET vese no compromiso de impulsar e promover é sen dúbida a
participación social que poñen en xogo as TIC. Nesta liña insírese o servizo
presentado pola asociación galega este xoves en Santiago: na liña de
recordarnos, pola vía das redes, que a nosa opinión conta. Falamos de e-democracia, un servizo que vai ser
empregado en breve pola propia EGANET e que se dirixe a facilitar, dentro dunha
asociación, a concorrencia dos socios na vida cotiá, na organización e no
futuro do ente ao que pertencen. “A clave”,
comentaron os responsables da asociación galega na súa cita cos medios no
Centro ON (Novacaixagalicia) de Santiago, “é
darlle a entender a calquera persoa que a súa participación é importante”.
Máis polo miúdo, trátase dunha plataforma
tecnolóxica desenvolvida por Enxendra
(firma integrante de EGANET) e que permite, entre outras cousas, o dereito ao
voto por Internet dos membros dun colectivo, todo avalado por recursos como a
sinatura dixital e a capacidade de identificación que achega o DNI electrónico.
“A nosa idea”, comentou Víctor López,
presidente de EGANET, “é partir de algo
xa estendido entre unha boa parte da cidadanía galega, ou piques de selo, como
é o DNI electrónico, para amosar as moitas vantaxes que ten este recurso no
eido da participación democrática, neste caso dentro dunha asociación”. Ao
seu xuízo, o labor disto ten valor duplo, xa que se contribúe tamén a expoñer
claramente e dunha vez por todas os beneficios da tarxeta electrónica que nos
identifica, hoxe en día por debaixo do seu potencial de uso.
Víctor López estivo acompañado na cita por
Daniel Cerqueiro, vicepresidente de EGANET, e máis por Brais Méndez, membro da
firma Enxendra Technologies, quen fixo un percorrido detallado polo
funcionamento e vantaxes da plataforma, entre as que se conta a fonda
transformación que imprime nos métodos tradicionais de votación, até o de agora
suxeitos a unha presenza obrigada do votante e a outros requirimentos que por
forza dan máis traballo e obrigan a máis desprazamentos do que sería desexable.
A cuestión clave é que grazas á simplificación
do labor de votación, de xeito paradoxal acádase unha meirande implicación do
socio na toma de decisións. “O día a día
de cada quen”, sinalou Cerqueiro perante os medios, “complica a marxe de participación na actividade asociativa;
desprazamentos, reunións, debates e finalmente as votacións, é un procedemento
que leva tempo de máis”. A solución que achega EGANET permite pois unha
toma de determinacións máis consensuada, meirande facilidade para formar parte
dun debate e máis o voto a través de Internet. Con isto, infórmase, camíñase
cara a supresión de xuntanzas de obrigada concorrencia física, evita
desprazamentos e achega axilidade e eficacia no día a día asociativo.
Na rolda de prensa convocada por EGANET tamén
participaron Juan Manuel Méndez (membro da empresa socia Iterdata Networks,
pioneira á hora de establecer os alicerces do proxecto) e Alejandro Lamas,
secretario da asociación empresarial galega. Xuntos fixeron fincapé no feito de
que a plataforma presentada en Santiago, que non xorde con arela de lucro,
responde a necesidades ben concretas que nos afectan a todas e todos. De feito,
todo integrante dunha asociación, colectivo, corporación, administración,
entidade ou empresa sabe ben o que significa que se gañe en axilidade,
comodidade e eficacia na toma de decisións do ente no que se integra.
Asemade, a aplicación garante un maior peso
democrático e de transparencia ao tempo “que
se salvagardan os principios básicos do asociacionismo”, comentou Alejandro
Lamas. A plataforma presentada, que como dixemos permite efectuar xeiras
continuas de voto electrónico (cuxos resultados se rexistran para poder
consultalos logo e optimizar o rumbo do colectivo), baséase en servizos de
sinatura dixital avanzada, “todo
substentado na lei de sinatura electrónica actualmente vixente”, explicou
Brais Méndez. A idea de Enxendra e EGANET acerca do futuro deste recurso é
tirarlle o máximo partido dentro da asociación, a partir de xa, e compartir con
outras entidades semellantes o seu emprego e as súas vantaxes. Como se dixo,
non haberá arela de lucro, polo que os posibles pagos reduciríanse só a cubrir
os custes de implantación.
A plataforma, informaron, ten potencialidades
no eido privado, nas empresas, e tamén nas institucións públicas, aínda que
esta vertente está aínda por desenvolver nunha segunda fase.
Por certo que e-democracia, tamén coñecida como Democracia Dixital, contou para o seu desenvolvemento co apoio e
colaboración da Secretaría Xeral de Modernización da Xunta de Galicia.