EGANET advirte de tentativas de suplantación de identidade que afectan a unha empresa socia
martes, 10 de xullo do 2012
Este martes espertamos cunha nova xenérica e
outra específica sobre suplantación de identidades nas redes. Dase a
casualidade de que ningunha das dúas achega un panorama moi acougante. A
primeira refírese á porcentaxe de
persoas que en España foron suplantadas recentemente ao abeiro das ferramentas
dixitais: un
8% da cidadanía, segundo apunta Eurobarómetro, porcentaxe da cal, un 1%, afirma
ter sido vítima destes delitos de xeito repetido. Pola súa parte, a entidade
galega EGANET advírtenos de que unha
empresa socia, Cosaart, leva sufrindo dende o pasado mes de maio este mesmo
problema de e-apropiación.
Máis polo miúdo, o nome da dita firma, estudo
de arte dedicado a crear imaxe corporativa e xestionar publicidade en liña, está
a aparecer en estratexias alleas de suposta índole comercial, que non teñen que
ver con ela, para obter cartos a través das redes.
Estaríamos pois ante un claro caso de
suplantación de identidade. As ditas estratexias, segundo informa EGANET,
consisten no emprego ilegal da devandita empresa para vender guías
publicitarias inexistentes, mesmo chegándose a xerar contratos e facturas
falsas para estafar baixo o seu nome. EGANET quere amosar o seu firme
rexeitamento a este tipo de prácticas, e advirte a todas aquelas persoas que
estean a ser obxecto destas tentativas de vendas, teñan en conta que baixo ningún
concepto poderán ter procedencia en Cosaart, xa que “ninguén que pertenza oficialmente a esta empresa pedirá diñeiro por
adiantado para calquera tipo de venda ou negocio”. De feito, engade a
entidade, todas as transaccións coa empresa real se realizan mediante
transferencia bancaria previo contacto dende a central cos clientes para pechar
as transaccións.
A empresa Cosaart desvincúlase totalmente das
accións que están sendo levadas a cabo por estes criminais. Estas estafas
estanse a dar na zona de Llanera en Asturias.