EGANET abre o prazo para presentarmos candidaturas á nova edición dos seus premios
mércores, 16 de novembro do 2011
- Víctor López, presidente da asociación galega, na gala da edición 2009 dos seus galardóns
EGANET quere
seguir traballando a prol da innovación galega e, tamén, por recoñecer esa
innovación e presentala perante o mundo. Por este motivo, vén de convocar unha nova entrega do seus
premios, uns galardóns con oito anos de traxectoria impulsando a
creatividade dos nosos profesionais, empresarios e axentes do noso sector
tecnolóxico-dixital, comprometidos co afianzamento das redes da información na
nosa terra. O prazo de presentación das candidaturas está xa aberto desde este
mércores 16 ata o día 8 de decembro de 2011 ás 23:59 horas. A gala de entrega
dos galardóns celebrase o 21 de decembro.
Segundo fai
saber EGANET, un ano máis convídase a participar no certame a unha ampla variedade
de convocadas/os potenciais: empresas, profesionais, asociacións, organizacións
empresariais, ONGs, entes públicos e calquera outro organismo con sede social
en Galicia poderán presentar as candidaturas aos premios, “sempre e cando realicen proxectos no eido das tecnoloxías da información
e as comunicacións”, sinala a asociación facendo referencia ás bases dos
premios. E continúa: “De non ter razón
social en Galicia, os/as candidatos/as poderán participar se teñen relación
clara coa cultura, lingua ou sociedade galegas”.
Nesta edición,
configuráronse as seguintes categorías: Mellor
Proxecto
Empresarial TIC, Mellor Proxecto Emprendedor TIC,
Mellor Aplicación
Software, Mellor Proxecto de Negocio Online e Mellor Comunicación Dixital.
A estas
engádese o Premio Especial EGANET, que a asociación
outorga ao proxecto,
entidade ou personalidade galega que desde a última edición dos galardóns “máis se esforzase en dar a coñecer e
impulsar a realidade galega na Rede e, deste xeito, contribuíse a promover as
novas tecnoloxías en Galicia” . Para esta modalidade non se recibirán
candidaturas e será EGANET a que elixa directamente ao premiado ou premiada.
O apoio de
máis de 800 empresas e 1.100 proxectos presentados nas sete edicións anteriores
avalan os Premios EGANET “como un
proxecto maduro, consolidado e o de maior repercusión para o sector TIC galego”,
sinalan fontes da asociación empresarial.
Os premios contan
con financiamento do Plan Avanza do Ministerio de Industria e da Secretaría
Xeral de Modernización e Innovación Tecnolóxica da Xunta de Galicia.