ECAI, o congreso de Intelixencia Artificial máis importante de Europa, celebrará o seu 50 aniversario en Santiago
martes, 5 de setembro do 2023
- Reunión de traballo no CiTIUS arredor da ECAI/ Imaxes de Andrés Ruiz
No
que o CiTIUS (USC) cualifica de “decisión sen precedentes”, a
Asociación Europea de Intelixencia Artificial (EurAI) anunciaba hai
apenas un ano que volvería celebrar o seu congreso de referencia
(ECAI European Conference on Artificial Intelligence) nunha
mesma sede (Santiago de Compostela). Facíao tras encomendar a súa
organización ao CiTIUS (Centro Singular de Investigación en
Tecnoloxías Intelixentes da USC) por segunda vez en catro anos, en
recoñecemento ao éxito alcanzado na edición dixital ECAI 2020.
Foi,
segundo lembrou o centro compostelán, “un evento pioneiro na
modalidade non presencial, creado en tempo récord pola pandemia de
COVID-19, que contou con máis de 5.000 participantes de 120 países
distintos, e no que se presentaron case 400 traballos de
investigación”.
Deste
xeito, “Santiago volverá ser o epicentro da Intelixencia
Artificial mundial en outubro de 2024, un ano de excepcional
importancia ao coincidir no tempo co medio século de vida do
congreso (organizado por primeira vez en 1974 no Reino Unido), e a
previsíbel próxima aprobación do Regulamento en IA da Unión
Europea, a primeira lei deste tipo a nivel mundial”, explican
fontes do CiTIUS, que agarda que ECAI 2024 reúna a máis de 1.000
investigadores de todo o mundo, así como entidades,
organizacións e empresas de ámbito global, que se darán cita en
Santiago de Compostela para presentar e debater sobre os últimos
avances científico-técnicos, o futuro da IA e as súas aplicacións.
“O
evento será un acontecemento de extraordinario interese económico e
social, e está promovido pola Asociación Europea para a
Intelixencia artificial (EurAI), que confiou a súa organización aos
investigadores do noso centro”, engadiron fontes do CiTIUS.
Primeiros
pasos
O
centro compostelán confirmou que a organización do evento está a
dar esta semana en Santiago os seus primeiros pasos, coas visitas
preliminares ás instalacións que albergarán o congreso e distintas
reunións de lanzamento. Nelas participan os responsábeis de
programa de ECAI 2024, Ulle Endriss (Universidade de Ámsterdam,
Países Baixos) e Francisco Melo (Instituto Superior Técnico de
Lisboa, Portugal); o responsábel xeral da conferencia, Fredrik
Heintz (Universidade de Linköping, Suecia); o presidente de EurAI ,
Carles Sierra (Instituto de Investigación en IA, CSIC); e os
presidentes do comité organizador, Senén Barro e Alberto Bugarín
(CiTIUS-USC).
Carles
Sierra, explicaba as razóns polas que EurAI decidiu repetir este
congreso en Santiago: “Malia
tódolos problemas que houbo pola pandemia, a organización de ECAI
2020 foi absolutamente exemplar, fantástica”, asegurou, engadindo
que “desde o punto de vista de EurAI , vendo o modo en que
reaccionaron en tan pouco tempo para facer que fose un éxito, a
verdade é que sabía moi mal que tanto esforzo organizativo non
tivese o premio de que a xente viñese visitar Santiago”. E
apunta: “Por iso, á primeira oportunidade que houbo, e dado o
interese da organización, a asemblea xeral de EurAI decidiu de
maneira unánime e por aclamación que se celebrase outra vez en
Santiago, para que a cidade puidese lucir. E a verdade é que
estivemos visitando os lugares onde se vai a facer, e as instalacións
son fantásticas… Penso que vai ser un éxito de participación , e
estou seguro de que eles van facer un traballo impecábel para facer
de Santiago un escaparate da Intelixencia Artificial europea”.
Así
mesmo, destacou a importancia de contar cun organismo deste tipo en
Europa, ao afirmar que “EurAI é unha federación de asociacións,
unha maneira áxil e simple de organizarnos, sen crear outras
estruturas nas que as asociacións queden diluídas. As organizacións
científicas teñen tamén o rol de axudar aos parlamentos a facer
leis que estean fundamentadas en documentos, informes… esa
interlocución é un dos papeis que temos que xogar”, dixo.
Pola
súa banda, os responsábeis de programa quixeron poñer en valor
tamén as implicacións sociais do encontro. Ulle Endriss
reflexionaba sobre o que cambiou a Intelixencia Artificial nestes 50
anos de historia de ECAI: “En 1974 a IA era moitísimo máis
pequena, había moitas menos disciplinas, menos xente traballando en
ela… cambiou unha chea, e nos próximos anos, como mínimo, vai
seguir cambiando moito. Algunhas cousas case podemos adiviñalas,
pero da maioría delas non temos nin idea, nin sequera podemos
imaxinalas. Coido que vainos sorprender, como xa nos ten sorprendido
no pasado, e estou desexando velo”.
E
engadiu Endriss: “Non se trata só de tecnoloxía: trátase tamén
de xente, de ideas, de conectar coas ciencias sociais ou as
humanidades… cousas que fan a IA moito máis emocionante, isto é
moito máis que traballar con computadores”. Tamén apuntou que
“dentro de 50 anos miraremos atrás e sorriremos, tal e como
facemos agora cando pensamos na primeira edición de ECAI en 1974”.
Pola
súa banda, Francisco Melo explicaba que “os éxitos acandados pola
Intelixencia Artificial nos últimos anos atraeron a atención da
sociedade, facendo este tipo de eventos máis atractivos para o
público, cada vez máis consciente da súa importancia. As grandes
compañías tecnolóxicas que teñen xa resultados de investigación
moi importantes no terreo da IA, participan cada vez máis en
congresos como ECAI”. Para o investigador do Instituto Superior
Técnico de Lisboa, “conferencias como estas son tamén unha
oportunidade para que o sector privado dea a coñecer a investigación
que se está desenvolvendo no seo das empresas, contribuíndo así ao
desenvolvemento da IA”.
Finalmente,
os responsábeis da organización de ECAI 2024 en Santiago, quixeron
salientar a importancia que ten para a cidade, a USC e o CiTIUS a
reedición deste congreso con tan pouca distancia no tempo. Para
Senén Barro, director científico do CiTIUS, “que o congreso máis
importante de Europa en IA volva a Santiago, e ademais celebrando o
seu medio século de vida, é un recoñecemento á nosa universidade,
e especificamente ao CiTIUS, como centro de investigación de
referencia internacional en intelixencia Artificial”. Unha visión
compartida polo investigador do centro Alberto Bugarín, que puxo o
foco no impacto que ECAI 2024 terá para a IA en Galicia e en España:
«Acoller novamente ECAI en Santiago de Compostela dará aos
estudantes e investigadores de IA, e tamén á sociedade en xeral, a
oportunidade única de coñecer os avances máis recentes e, sobre
todo, interactuar cos mellores profesionais da IA a nivel mundial”.