Dúas peticións galegas en Change.org, na escolma de vitorias do ano da plataforma
luns, 15 de decembro do 2014
- Unha das campañas galegas ía directamente encamiñada a protexer aos animais
Os impulsores no ámbito
estatal da plataforma Change.org,
que xunta a activistas-internautas de todo mundo brindándolles a
posibilidade de apoiar mobilizacións ou protestas de xeito doado e
inmediato, veñen de facer reconto dos máis salientábeis logros
acadados pola comunidade: éxitos canalizados a través de todo tipo
de peticións colectivas. Pois ben, na listaxe de sete peticións
seleccionadas para ilustrar o potencial de acción e consecución da
plataforma a nivel español hai dúas iniciativas relacionadas coa
nosa terra.
Son, máis en detalle,
dúas peticións creadas en Galicia. Por
unha banda a creada pola Asociación Animalista Libera para
solicitar, como xa se conseguiu, o endurecemento das penas por malos
tratos animais e, pola outra, a
conseguida por Francisco Yépez, que logrou que Vigo teña un
servizo de atención para lesionados medulares.
As dúas campañas forman
parte do vídeo de vitorias que
resume o ano que enfía a súa recta final en materia de activismo en
liña. Trátase dun pequeno resumo protagonizado polos propios
impulsores das iniciativas, que conseguiron incidir en ámbitos como
a igualdade, os dereitos dos animais ou a accesibilidade.
Lembrar que a plataforma
acadou en 2014 os seis millóns de usuarios en España. Isto
significa que o 20% dos internautas son usuarios da devandita
comunidade de activistas. En palabras de Francisco Polo, director de
Change.org a nivel estatal, “España é o país do mundo cunha
maior proporción de usuarios de Change.org e os cambios que
conseguen os usuarios, a súa capacidade de incidir na axenda pública
e a repercusión das peticións, é boa mostra diso”.
Dos devanditos seis
millóns de usuarios, 3.193.932 participaron en peticións que
conseguiron o seu obxectivo. Só este ano, máis dun millón de
activistas de Change.org experimentaron vitorias por primeira vez.
“En Galicia”, informan os responsábeis da plataforma, “o
número de membros da comunidade supera os 326.000 cidadáns o que
supón un de cada cinco galegos con Internet xa inicie ou asine
algunha petición”.
Change.org tamén
salienta o caso da viguesa Beatriz Figueroa, enferma de cancro, que
xa conseguiu máis de 516.000 sinaturas solicitando unha maior
protección para os enfermos da dita doenza en situación de
desemprego. A súa campaña lidera o ránking de
peticións en canto a número de apoios acadados. Lembrar que Beatriz
é avogada e xornalista e, en palabras da plataforma, “tivo a mala
sorte de ser diagnosticada de cancro mentres estaba desempregada”.
Arestora está a pedir ao Congreso dos Deputados que cambien a lei e
protexan aos enfermos desta doenza. En novembro un xulgado
recoñeceulle a incapacidade permanente. Gañou unha batalla
xudicial, pero mantén a súa loita para conseguir esa protección
para os enfermos de cancro.