Dúas empresas TIC da Tecnópole representan a España no Euronoise 2009
luns, 26 de outubro do 2009
A empresa Sonen, Centro de Acústica e
Servizos de Telecomunicacións, e a spin-off que puxo en marcha xunto coa
Universidade de Vigo, Sound of Numbers, son as únicas representantes españolas
que acuden hoxe ao congreso europeo Euronoise 2009, o máis importante do sector
a nivel internacional, que está a desenvolverse na cidade británica de
Edimburgo.
No Euronoise deste ano, que finaliza o
vindeiro mércores 28, déronse cita preto de 50 empresas de toda Europa
dedicadas ao desenvolvemento de tecnoloxías e sistemas de control do ruído,
entre as que se atopa Sonen, que inicia a súa actividade na incubadora de
empresas de Tecnópole e que apenas conta con dous anos de actividade
profesional.
Neste corto espazo de tempo dende a súa
creación, esta entidade xa foi recoñecida cun premio do certame de Proxectos
Empresariais Innovadores da Universidade de Santiago de Compostela (USC) e
agora, acude a Edimburgo para dar a coñecer a súa actividade alén das nosas
fronteiras.
Asemade, a partir da súa estreita
relación en proxectos de I+D+I con outra das Universidades galegas, a de Vigo,
naceu a spin-off Sound of Numbers, que agora se presenta no congreso europeo
máis relevante no seu ámbito de actividade.
O primeiro logro importante da spin-off de Sonen e a Universidade de Vigo foi
un novo software para o cálculo de illamento acústico en edificios segundo o
Código Técnico da Edificación.
A aplicación SONarchitect CTE, que
permite estimar o illamento acústico da totalidade dun edificio conforme á nova
normativa, foi moi ben acollida polo sector da construción no seu primeiro ano
de vida porque, segundo afirman os seus responsables, “cobre a lagoa que as esixencias do Código Técnico de Edificación
deixaron no mercado, xa que as ferramentas de cálculo existentes até entón
verificaban unicamente o illamento por pares de recintos (habitacións), o que
obrigaba ao arquitecto a introducir varias veces a información dun mesmo
proxecto”.
Agora, en Edimburgo, a empresa presentará unha nova versión da aplicación,
a SONarchitect ISO, na que, seguindo a mesma filosofía que a orixinal,
realizará os cálculos de illamento acústico na totalidade dun edificio, esta
vez adaptado á normativa europea, seguindo a norma ISO UNE 12354.
Segundo informa Sonen, “estas son
aplicacións de software intelixente que analizan o edificio no seu conxunto,
realizan a verificación integral de todos os requirimentos para todos os pares
de recintos dun mesmo inmoble e emiten unha folla xustificativa”. Ademais,
engaden, “permítenlle ao proxectista
debuxar con toda flexibilidade o seu edificio, visualizalo en 3D e actuar sobre
el”.
Ademais de participar cunha caseta propia na zona de expositores de Euronoise,
Sound of Numbers presentará un relatorio sobre as súas investigacións no
cálculo de perdas de inserción en sistemas illantes de vibracións en trens.