Dous traballos do CITIC sobre IA e sustentabilidade, premiados polo Comité Español de Automática
luns, 26 de setembro do 2022
O
CITIC (Centro de
Investigación TIC) da UDC conseguiu novos e importantes logros
no ámbito da Intelixencia Artificial aplicada ao desenvolvemento
sustentábel, un eido de actividade considerado “estratéxico”
para a transferencia tecnolóxica do centro de investigación
coruñés. Así, o grupo que dirixe José Luis Calvo-Rolle vén de
recibir cadanseu premio da man do Comité Español de Automática
(CEA) por dous traballos sobre control intelixente en enerxía eólica
e almacenamento de enerxía con hidróxeno, respectivamente.
Os
recoñecementos fortalecen as áreas de investigación en IA aplicada
á sustentabilidade nas que traballa o CITIC, en colaboración con
entidades públicas e privadas, en liña cos obxectivos globais de
eficiencia enerxética. Neste eido, destacan iniciativas de alcance
europeo no contexto Horizonte 2020, como o Smartees, para modelado
de innovación social enfocada á transición cara a eficiencia
enerxética e a sustentabilidade; ou o acordo que mantén co Concello
da Coruña desde o pasado ano para avanzar, como socio tecnolóxico,
na dixitalización da mobilidade e no deseño dun mapa de zonas de
baixas emisións.
Maior
eficiencia no almacenamento de enerxía con hidróxeno
Segundo
explicaron fontes do CITIC, o artigo Intelligent hybrid system for
the prediction of the voltage-current characteristic curve of a
hydrogen-based fuel cell céntrase “nunha aplicación punteira
e moi prometedora” enfocada ao almacenamento de enerxía mediante
hidróxeno, considerado aliado da loita contra o cambio climático.
Concretamente, “falamos dun modelo híbrido intelixente para
predicir o comportamento dinámico dunha pila de combustínrl
alimentada por hidróxeno. O proceso de modelado é capaz de captar a
enorme complexidade do comportamento do sistema grazas á combinación
de técnicas de agrupamento e, posteriormente, técnicas intelixentes
de regresión con redes neuronais artificiais sobre cada un dos
grupos”, explica José Luis Calvo-Rolle. Esta contribución,
engade, representa a gran vantaxe de coñecer con antelación o
estado en que se atopa a pila de combustíbel, permitindo xestionar a
estratexia do seu control de maneira máis eficiente.
Algoritmos
intelixentes para prever anomalías na fabricación de aero-xeradores
No
outro artigo premiado (Anomaly detection based on intelligent
techniques over a bicomponent production
plant used on wind generator blades manufacturing) trátase a
detección de anomalías nunha
instalación empregada para obter o material do cal se fabrican as
pas de aero-xerador. “A súa principal achega reside en que a
aparición de anomalías é detectada de maneira satisfactoria sen
contar con coñecemento previo sobre a natureza destas, o cal é
especialmente complexo tendo en conta o amplo abano de posíbeis
fontes orixinarias dun evento adverso nunha contorna industrial, como
poden ser os fallos en sensores e actuadores, o envellecemento de
equipos, as perturbacións nas medidas, etc”, en palabras do
investigador do CITIC. Esta tarefa realízase a través de algoritmos
intelixentes de tipo one-class que aseguran a detección
precoz de anomalías, contribuíndo ao mantemento, á optimización
e, consecuentemente, á eficiencia da instalación.