Dispoñíbel un catálogo en liña con máis dun centenar de solucións TIC de mobilidade
luns, 30 de novembro do 2015
As empresas galegas
teñen á súa disposición na Rede, dende xa, unha porta de entrada
a a máis dun centenar de solucións tecnolóxicas destinadas a
satisfacer as súas demandas (crecentes) de mobilidade. Así nolo
fixeron saber estes días as dúas entidades responsábeis da
iniciativa, AMTEGA e Clúster TIC. O repositorio chámase
PemeMobil.gal, catálogo
de solucións TIC en mobilidade e, segundo engaden, “ofrece
unha mostra representativa da tecnoloxía en mobilidade ofertada en
Galicia”.
En termos concretos,
abrangue máis de 115 solucións TIC de 60 provedores
tecnolóxico-dixitais galegos, incluíndo tamén máis de 90 casos de
éxito de implantación en empresas. A través deste catálogo,
explican AMTEGA e o Clúster, “as empresas poden localizar
facilmente e por múltiples criterios de busca aquelas solucións en
mobilidade máis acaidas para o seu negocio, así como identificar os
provedores tecnolóxicos que llelas fornezan”.
PemeMobil.gal foi
presentado no marco das xornadas SmartPeme, peme móbil e
conectada celebradas o pasado 25 de novembro no Centro
Demostrador TIC de Galicia, contándose coa presenza de preto de 75
profesionais da nosa terra.