Dispoñíbel en Android a aplicación de Monument Tracker para afondarnos no coñecemento da Ribeira Sacra
mércores, 31 de xullo do 2013
A empresa francesa
Monument Tracker, gañadora do concurso de Imagina Atlántica para a posta en valor do patrimonio cultural dos socios deste proxecto (no que participa a Deputación de Ourense), vén de pór
a
disposición dos usuarios de Android unha interesante aplicación
turística para afondarmos no coñecemento da Ribeira Sacra. A
firma gala, de gran experiencia en recursos turísticos-culturais
para teléfonos intelixentes e tablets (ten guías e
ferramentas TIC dunha chea de cidades do eido internacional), contou
para este traballo coa colaboración da portuguesa Ideias e Conteúdos
e da galega Astrágalo (que
achegou todo tipo de contidos e mesmo o personaxe protagonista, Frei
Bieito). O desenvolvemento en cuestión, que en breve contará
con versión para iOS, fornécese en galego, portugués, inglés e
español.
O principio desta aplicación móbil é o de enriquecer a
experiencia turística dos viaxeiros para afondar no coñecemento dos
moitos monumentos e riquezas paisaxísticas que atesoura a Ribeira
Sacra.
A ferramenta foi desenvolvida por encargo da Deputación de
Ourense ao abeiro do proxecto europeo Imagina Atlántica, no
que participan Galicia, o norte de Portugal, Gales e
Poitou-Charentes/GrandAngoulême).
Tal e como sinalamos no
seu día nunha entrevista co presidente de Monument Tracker,
Jean-Jacques Lottermoser, a aplicación ofrece unha serie de
cousas a ter en conta para xente de tódalas xeracións: debuxos
animados (da man do devandito Frei Bieito), opcións de realidade
aumentada, xogos de caza do tesouro, achegas á historia dos
monumentos ou rutas turísticas. O obxectivo do organismo provincial
galego foi o de pór a disposición dos viaxeiros unha ferramenta que
reflectise e potenciase o rico patrimonio desta contorna galega,
abeirada aos ríos Sil e Miño e especialmente importante dende o
punto de vista arquitectónico (acubilla unha chea de conxuntos
monásticos de diferentes envergaduras, estilos e niveis de
conservación) e paisaxístico.
Tal e como temos
comentado previamente, a vertente divulgadora non se rifou no
proxecto coa vertente lúdica, máis ben buscáronse unha a outra.
Así, dende a orixe da iniciativa procurouse unha combinación
equilibrada entre ambos elementos: a pescuda histórica e a vontade
de xogar. A xuízo de Monument Tracker, estamos ante unha aplicación
con potencial para abranguer e interesar a moitos tipos de viaxeiros,
mesmo aos máis pequenos da familia, que terán a posibilidade de
xogar e afondar no coñecemento da súa contorna coa colaboración
dos seus acompañantes. Ademais, engade a firma francesa, a
ferramenta gustará aos seareiros do patrimonio histórico, e tamén
aos autores de banda deseñada, aos ilustradores e aos animadores,
aos profesionais da produción (vídeo, audio, efectos sonoros) e do
turismo.
As funcións da
aplicación son as seguintes:
1. Caza do tesouro: Oito
enigmas veñen propostos polo pequeno monxe, Frei Bieito, e cada
resposta correcta desbloquea o seguinte misterio, cunha recompensa ao
final dos percorridos.
2. Percorridos: Ofrécense
varias temáticas, pódese empezar o percorrido onde se prefira, a
realidade aumentada permitirá guiarse pola zona.
3. Xogo: Poderemos
converternos en Embaixadores da Ribeira Sacra contestando as
preguntas do xogo.
4. Postais: Teremos a
posibilidade de enviar desde o noso smartphone ou tablet unha verdadeira postal en papel que os nosos amigos recibirán
nas súas casas por correo ordinario.
5. Paseo libre: Os
monumentos desvelarán a súa historia de acordo co noso paseo grazas
ás notificacións automáticas, non será preciso facer ningunha
procura xa que o noso teléfono móbil avisaranos dos monumentos
próximos e revelará as súas historias e anécdotas. A maiores,
tamén poderemos descubrir os lugares desaparecidos (ou o seu aspecto
no pasado), ver as diferentes presentacións do monumento ou do lugar
en cuestión (cómics, fotos exteriores e interiores, debuxos),
consultar reportaxes ou vídeos relativos aos sitios de interese,
compartir en Facebook as nosas opinións ou personalizar a aplicación
coas nosas fotografías.
6. Realidade aumentada:
Lugares importantes, os puntos de partida dos percorridos aparecen ao
noso arredor en modo cámara, permitíndonos orientarnos para chegar
aos sitios de interese.
Quen está detrás da
aplicación?
A aplicación foi
financiada e ofrecida polo Programa Espazo Atlántico (Interreg) para
a valorización do patrimonio no contexto do Proxecto
Europeo Imagina
Atlántica e que axiña será implementada tamén noutros
destinos membros do proxecto. Imagina Atlántica enmárcase
no Programa Transnacional Espazo Atlántico 2007-2013, co-financiado
ao 65% polos fondos FEDER. O seu obxectivo é estimular a posta en
marcha de novos vieiros de produtividade, opostos ao que nos levaron
á crise, e que se baseen ante todo no coñecemento e no coidado das
características culturais e sociais de cada contorna. Ou sexa, que
estamos a falar dunha iniciativa para fomentar a actividade económica
a través do desenvolvemento local e dun aproveitamento rendíbel e
creativo das novas tecnoloxías da imaxe. E todo “a escala
atlántica”, poñendo estas tecnoloxías a disposición do
patrimonio desta beira oceánica na que se emprazan os pobos
participantes no proxecto (Gales, Poitou-Charentes, Galicia e Norte
de Portugal).
O proxecto aposta por experimentar co artellamento
dun cluster (termo inglés que se emprega nos eidos
tecnolóxico e empresarial para referirse a distintos agrupamentos ou
conxuntos integrados de elementos) que poña en rede a creación de
traxectos turísticos e culturais, empregando os recursos que ofrecen
as novas ferramentas da imaxe. Un exemplo disto é o traballo
despregado pola Deputación de Ourense, integrante do Proxecto
Imagina Atlántica, para achegar valor engadido á Ribeira Sacra
a través dun proxecto piloto innovador que deu como resultado a
aplicación móbil da que falamos nesta mesma reportaxe.