Dinahosting intervén nos XXV Encontros para a Normalización Lingüística do CCG
luns, 16 de outubro do 2023
Este
martes 17 de outubro celébrase a XXV edición dos Encontros para a
Normalización Lingüística que organiza o Centro de
Documentación Sociolingüística de Galicia (CDSG) do Consello da
Cultura Galega (CCG), desta volta baixo un epígrafe que avanza boa
parte dos contidos a tratar: Economía, lingua e sustentabilidade.
A presidenta do CCG, Rosario Álvarez, inaugura esta cita que
pretende reflexionar sobre o papel do idioma no ámbito
socioeconómico, poñendo o foco nas posibilidades que abre para
incrementar o prestixio das empresas e aumentar produtividade.
Falarán os responsábeis da tecnolóxica Dinahosting, referente en
servizos en liña e de hospedaxe web, pero tamén de Daveiga, Espiga,
FEGATUR, Vegalsa-Eroski, Deleite Cooperativa 57 ou Caixa Rural
Galega, entre outras empresas. O encontro será presencial pero
poderase seguir en directo a través do web e as redes sociais da
institución.
Rosario
Álvarez Blanco, David Cobas Medín, Mónica Fernández Valencia, Ana
Iglesias Álvarez, Manuel Maseda Deán, Susana Mayo Redondo, Bernardo
Penabade Rei, Bieito Silva Valdivia, Anxos Sobriño Pérez, Marta
Souto González e Xaime Varela Sieiro son os coordinadores desta
edición.
A
xornada divídese en tres bloques. No primeiro falarase da situación
da lingua galega no sector económico, na que o investigador do ILG
(USC), Miguel Guisantes, ofrecerá unha descrición panorámica do
uso do galego nos sectores recollidos no plan de dinamización
lingüística galega no tecido económico. Após esta panorámica, o
avogado e consultor Xoán Antón Pérez Lema, xunto con Sara Seco
Rial, da Mesa pola Normalización Lingüística, farán unha análise
dos dereitos dos consumidores e consumidoras, das dificultades
xurídicas para exercelos e das experiencias de reclamacións destes.
No
terceiro bloque toman a palabra os responsábeis de diferentes
empresas para explicar as súas experiencias. Unha delas ofrece unha
perspectiva histórica da promoción do uso da lingua mediante
actividades de entidades públicas e privadas. Capacidade
dinamizadora de determinados sectores económicos centrados en
servizos de mediación. Visión externa desde a perspectiva da
publicidade. Nela participan Xosé Carballido Presas, Irmandade
Galega de Agroalimentarios e Adegueiros (IRGADE); Paulo Rodríguez de
Dinahosting; Emi Candal de Espazo coop. Unión de Cooperativas
Galegas e Xosé García, DAG: Asociación Galega do Deseño.
Pola
tarde celebraranse as dúas mesas que continúan a dar voz ás
experiencias prácticas. Una delas titúlase Lingua, calidade e
proximidade, serve para a presentación e posta en valor de
empresas que unen a lingua galega aos seus principios de calidade e
proximidade. Gabriela González de Vegalsa-Eroski; Pedro González
Boquete de Deleite; Antón Ínsua de Coop57 e Jesús Antonio Méndez
Álvarez-Cedrón da Caixa Rural Galega achegan a súa visión.
A
última das mesas é Lingua e sustentabilidade na que Carolina
Sánchez Sanz de Espiga. Asociación Galega para a Bioconstrución;
Francisco Xabier Almuíña de FEGATUR (Federación Galega de Turismo
Rural); e Xosé Lois Lamazares das galletas Daveiga, amosarán a súa
visión do binomio galego e sustentabilidade. A xornada remata cunha
actuación do Mago Teto.