Dinahosting incorpora os discos NVMe á súa infraestrutura de aloxamento na nube
xoves, 19 de decembro do 2019
Dinahosting,
a empresa galega de dominios online e hospedaxe web, vén de
anunciar a incorporación ao seu catálogo de servizos de cloud
hosting dos discos NVMe, unha tecnoloxía moi axeitada para
quen queira ampliar recursos nun intre determinado, ao proporcionar
“respostas máis rápidas e efectivas”. Dinahosting explica que
os discos achegan meirande velocidade de lectura, escritura e largo
de banda, reducindo a latencia e a sobrecarga no servidor.
Respecto
dos tradicionais SSD, as taxas de transferencia e os IOPS (número de
operacións de entrada e saída de datos que ocorren por segundo) ven
aumentada até en 5 ou 6 veces a súa capacidade coa entra en xogo
dos discos cloud NVMe, que tamén achegan amplos e efectivos
recursos para manter baixo control os picos de carga.
Dinahosting
subministra neste punto unha serie de exemplos concretos de intres e
situacións nos que probábelmente agradezamos a presenta destas
novas tecnoloxías na nube: “Imaxinade que organizades un festival
e necesitades que a vosa web funcione a pleno rendemento durante a
venda de entradas. Ou que acabades de lanzar ao mercado un produto
absolutamente novo e todo o mundo quere velo. Ou que estades en pleno
Black Friday e dispáranse as vosas vendas”. Os ditos discos,
engade a empresa, evitarán que a nosa web caia durante estes
traballos de promoción ou de lanzamento de produtos. “O mellor de
todo”, explica a empresa con sede en Vista Alegre (Santiago), “é
que desde o panel de control de Dinahosting podemos programar o
escalado de recursos da hospedaxe na nube á hora que queiramos e cos
recursos que indiquemos”.