DesTapa Vilagarcía anímanos a votar co noso dispositivo pola mellor tapa local
martes, 16 de xuño do 2015
Xa
apenas quedan concursos na vida real que non se apoien directamente
na Rede e nos dispositivos para o seu desenvolvemento. De certo, a
tendencia é que todo sexa 2.0, con todas as vantaxes que isto pon en
xogo: por exemplo ampliación da marxe de actividade do
usuario/cidadán. Precisamente, pola banda de Arousa están a piques
de pór en marcha a terceira entrega de DesTapa
Vilagarcía, unha actividade de promoción hostaleira que non se
entende sen a participación da xente e cadanseus dispositivos.
Trátase, máis en detalle, dunha ruta na que concorren 20
establecementos locais (cinco deles de Carril) que presentan outras
tantas tapas creativas. Os participantes poderán votar polas súas
preferidas nos propios locais e través do móbil. Haberá un total
de 30 agasallos. A actividade fica activa entre o 19 de xuño e 28 do
mesmo mes.
Respecto
das mini-racións
a degustar, a organización (AHITUVI, a
Asociación de Hostaleiros e Iniciativas Turísticas de Vilagarcía)
sinala que “hai un pouco de todo”,
dende propostas innovadoras como a do polbo encebolado
en sobres de pasta brick
con queixo afumado e pementón
da Vera, até o tataki de
atún crocante con escuma de pataca, algas, pétalos e vinagreta de
mango, pasando pola
ensalada de paté mariñeiro con queixo do Cebreiro, gelée
de albariño e crocante de gambón. Por
suposto, tamén haberá propostas de corte moito máis clásico, para
cubrir o meirande abano de gustos.
Respecto
do concurso, lembrar que o público poderá votar pola súa tapa
favorita de entre as 20 propostas. Para isto, sinalan os
organizadores, o participante deberá facerse co Libro de Ruta,
dispoñíbel en todos os locais participantes, e ir selándoo cada
vez que deguste una tapa até completar un mínimo de dez
establecementos. Unha vez que conte cos dez selos poderá votar e
depositar a súa papeleta, cos seus datos para poder ser localizado
no caso de que resulte premiada, nas urnas que hai en cada local. Do
reconto de todos os votos correctamente emitidos sairán o primeiro,
segundo e terceiro premio á mellor tapa de DesTapa Vilagarcía.
Entre
todas as papeletas depositadas realizarase un sorteo de máis de 30
premios, entre os que salientan, segundo apuntan os organizadores,
“unha escapada a un hotel de Cee con subida ao Monte Pindo con guía
incluída, vales de compra na Praza de Abastos de Vilagarcía, en
Zona Aberta e en Gadis, circuítos de spa, reprodutores MP4, unha
cafeteira de cápsulas e diversos lotes de viños, conservas e
produtos gourmet, entre moitos outros”.
Como
dixemos, é posíbel participar no certame a través do móbil, tanto
seguindo os roteiros como votando pola nosa tapa máis acaida. Isto
deberemos facelo a través da aplicación Rutappa, que é a gran
novidade desta terceira edición, a 2015. A ferramenta está
dispoñíbel para libre descarga en Google Play e máis na tenda de
Apple. A aplicación amosa as fotografías e a descrición de todas
as mini-racións así como o emprazamento dos 20 locais
participantes. A organización outorgará un premio á tapa máis
votada a través de Rutappa. Así mesmo, tamén se sortearán varios
premios entre os que utilicen esta ferramenta para votar.