David Trigo incorpórase como xerente do Cluster TIC Galicia
xoves, 4 de novembro do 2010
David Trigo López,
enxeñeiro industrial e gran coñecedor do sector das Tecnoloxías da información
e a comunicación, vén de incorporarse ao Cluster TIC Galicia como xerente da
entidade, logo de ser aprobado o seu nomeamento polo Comité Estratéxico
celebrado o pasado 29 de setembro.
Natural de Lugo,
o novo xerente do Cluster TIC Galicia é enxeñeiro industrial pola Universidade
Antonio de Nebrija e completou os seus estudos superiores co postgrao de
desenvolvemento de habilidades directivas ‘Program
for Management Development’ de ESADE.
Trigo conta cun
profundo coñecemento do sector das tecnoloxías da información e das
comunicacións, froito do seu traballo de asesor TIC. Antes da súa incorporación
ao Cluster TIC Galicia, desempeñaba o seu labor profesional na firma Accenture.
Respecto aos seus
obxectivos no seu novo cargo, David Trigo indicou: “a curto prazo, as miñas prioridades son afinar o funcionamento do
aparato administrativo do Cluster, seguir mellorando os resortes de
comunicación e cooperación entre os membros da entidade, e impulsar a coordinación
entre os grupos de traballo. Tamén darei o máximo apoio ao equipo que está a
elaborar o Plan Estratéxico 2011-2013, que será un documento fundamental para a
entidade. A medio e longo prazo, temos retos importantes, como acadar a
autonomía financeira e converter o Cluster TIC Galicia nunha auténtica
plataforma de servizos para as empresas e entidades do sector na nosa
comunidade autónoma”.
