Curtas na Rede proxecta en Verín os seus filmes máis galardoados
venres, 26 de xuño do 2009
O
Telecentro de Comunicación de Verín, seguindo o exemplo do Concello de Abegondo,
que está a proxectar as curtas gañadoras do concurso Curtas na Rede para mostrarlle aos veciños e veciñas do lugar a
calidade do audiovisual galego, vén dar acollida tamén á primeira sesión de
exhibición de curtas gañadoras nas súas propias instalacións.
Alí, a
Rede de Telecentros de Comunicación de Galicia (RTC) quixo, unha vez máis, dar
a coñecer todo o que se está a facer no noso país en torno ao sector
audiovisual, e en concreto ao referente ás curtametraxes, e está a proxectar as
curtas gañadoras das tres primeiras edicións do concurso que organiza a
Secretaría Xeral de Medios en colaboración co Consello da Xuventude de Galicia.
O devandito
Telecentro, ao igual que o de Abegondo, está a poñer a disposición de todos os
interesados en participar en Curtas na Rede 09 (cuxo prazo de
inscrición remata o 10 de setembro), todos os recursos dos que dispón, como
cámaras de video, material informático… que lles permite desenvolver os seus
propios proxectos audiovisuais e presentalos a concurso.
Curtas na Rede, únese deste xeito, e unha vez máis, á campaña de dinamización da Rede de
Telecentros de Comunicación Comunícate,
que está a desenvolver a Secretaría Xeral de Medios nos distintos centros
dependentes do Centro Mulltimedia de Galicia (CMG) co fin de dar a coñecer á
poboación as distintas posibilidades que ofrecen os Telecentros de Comunicación.
A través desta campaña búscase, segundo afirman os seus responsables, “que os Telecentros de Comunicación se
incorporen como alternativa habitual na axenda de tempo libre da cidadanía e
que se constitúan en focos dinamizadores de acceso ás novas tecnoloxías”.