Cuntis, Forcarei, A Illa, Moraña e As Neves participan nun proxecto piloto contra a fenda dixital
martes, 24 de outubro do 2023
O
deputado de Reto Demográfico, Xuventude e Desenvolvemento Rural,
Jorge
Cubela, mantivo este luns 23 de outubro unha reunión cos concellos
participantes no proxecto provincial Hub para a loita contra a
fenda dixital e a soidade non desexada no medio rural da
provincia de Pontevedra para informar dos avances que se
produciron no relativo a este proxecto e resolver dúbidas. Os
concellos que participan nesta primeira experiencia piloto, que conta
cun orzamento de 500.000 euros dos que o Ministerio para a Transición
Ecolóxica e o Reto Demográfico achega 280.000 euros e a Deputación
os 220.000 restantes, son Cuntis, Forcarei, A Illa de Arousa, Moraña
e As Neves.
Cubela
explicou que “logo de meses de traballo” o pasado 13 de outubro
aprobouse o expediente de contratación para a adxudicación do
contrato para implantar e desenvolver a plataforma formativa que
fundamenta o hub: “É un proxecto vertebrado en dúas
licitacións, esta primeira e unha segunda que se atopa en
tramitación interna, referida ao deseño, impartición e formación
para capacitar dixitalmente as persoas participantes”, debullou o
deputado, ao tempo que lembrou que o obxectivo é “mellorar o
acceso aos servizos da Administración Electrónica das persoas
participantes e dotalas dunha maior autonomía nas xestións
electrónicas da vida ordinaria ou sobre o uso de redes sociais”.
Para
acadalo desenvolveranse sete accións formativas de cinco horas de
duración en cada un dos concellos, que versarán sobre a
Administración Electrónica, a xestión online do SERGAS, a
banca móbil, as redes sociais ou a creación de vídeos. Esta
formación irá acompañada dun servizo de asesoramento e de titorías
que se espera se desenvolva entre os meses de febreiro e maio.
Ademais,
o responsábel provincial de Reto Demográfico explicou as bases para
a selección do alumnado e das e dos influencers que
participarán no programa: “Por unha parte, haberá un máximo de
50 alumnas e alumnos por concello, que deben ser nacidos antes de
1973 ou ser maiores de 18 no caso de que acrediten algunha
discapacidade, presten servizos de axuda a domicilio ou acrediten a
condición de persoa coidadora con maiores ao cargo; pola outra, as e
os influencers (5 por concello participante) serán persoas
destacadas a nivel municipal e con capacidade de mobilización e
influencia sobre outras, que demostrarán en primeira persoa os
beneficios do uso de ferramentas dixitais, maiores de 18 anos e
empadroadas no concello, e serán elixidas por unha comisión de
valoración con representantes dos cinco concellos e da Deputación”.