Coremain, partner oficial da plataforma cloud Salesforce
martes, 2 de novembro do 2021
A
empresa
galega Coremain é xa partner oficial de Salesforce,
plataforma mundial de solucións de xestión de clientes e procesos
de negocios (CRM), unha área na que a firma tecnolóxica con sede
principal en Santiago, no Polígono de Costa Vella, leva mergullada
dende os seus inicios haia agora tres décadas. O acordo entre as
empresas é aínda máis destacábel se temos en conta que Salesforce
amosa un ritmo de crecemento do 30% anual, por enriba de compañías
como SAP ou Microsoft.
Salesforce,
para que non o saiba, dá nome a unha ferramenta baseada na nube que
integra todos os procesos de negocio para as empresas (mercadotecnia,
vendas, servizo ao cliente, comercio electrónico, etc). Este feito,
explican dende a empresa galega, converte a dita ferramenta “nun
elemento clave nas transformacións dixitais impulsadas por
Coremain”, de aí que o equipo da compañía galega traballase
duramente na consecución da certificación DEX450 (Programmatic
Development Using Apex and Visualforce).
“Esta
nova consideración como partners oficiais”, explican
dende Coremain, “achéganos un valor engadido, grazas ás maiores
axilidade e flexibilidade do equipo, cunhas capacidades dixitais e
cualificacións actualizadas”. Neste sentido, desde Coremain
valoran “a posibilidade de ofrecer os servizos de implantación e
soporte do ecosistema Salesforce”, para que os procesos dos
clientes da firma galega sexan máis eficientes e, por tanto, máis
competitivos. Amais, para Coremain, ser implementadores de Salesforce
tradúcese “nunha excelente oportunidade para continuar medrando
con novos proxectos e consolidando así o noso posicionamento no
ecosistema de compañías IT”.