Constituído o órgano colexiado que velará pola axeitada implantación da eAdministración a nivel galego
luns, 3 de novembro do 2014
O Executivo galego
informou o pasado sábado que vén de dar forma á Comisión de
Seguridade e Goberno Electrónico, que constitúe o órgano colexiado
de máis alto nivel do sector público autonómico e que, segundo
expón a Xunta, é responsábel do impulso, coordinación e decisión
no eido da seguridade da información e do eGoberno. Na súa
constitución (un
proceso presidido pola Axencia para a Modernización Tecnolóxica de
Galicia, AMTEGA), participan todas as consellerías. Logo de ter
collido forma definitiva, a Comisión dará acubillo a tres
subcomisións de apoio para o desenvolvemento das súas funcións.
Segundo informa a
axencia, nun prazo máximo de tres meses crearase unha subcomisión
específica no ámbito de Seguridade da Información, que se
encargará de aprobar as directrices e instrucións referentes ao
devandito ámbito e velar polo seu cumprimento; unha subcomisión de
Interoperabilidade e Administración Electrónica, á que lle
corresponde propoñer as medias para adaptarse ao Esquema Nacional de
Interoperablidade e o seguimento das actuacións para implantar a
eAdministración no sector público; e a subcomisión de Presenza Web
e Goberno Aberto, que terá entre as súas funcións “difundir a
guía de políticas web corporativas, incorporar novos portais e
servizos web sociais e propoñer plans de actuación en materia de
transparencia e participación cidadá”, engade AMTEGA.
A axencia tamén fai
fincapé en datos concretos e obxectivos a curto e medio prazo, entre
os que se contan a aprobación do Plan Director de Seguridade da
Información, que será a folla de ruta da Xunta de Galicia no eido
da e-protección para os vindeiros tres anos e que fixará
iniciativas para garantir a seguridade dos
sistemas, os datos, as comunicacións e
e os servizos electrónicos.
Outro dos obxectivos a
curto prazo da Comisión é a aprobación novo Plan de
desenvolvemento da Administración e o Goberno dixitais 2014-2020,
“que permitirá evolucionar e consolidar as medidas desenvolvidas
desde 2010, ano no que se puxo en marcha a primeira estratexia para
avanzar cara unha verdadeira Administración Electrónica”, explica
a axencia que dirixe Mar Pereira.