Confirmados preto de 30.000 borradores ante unha nova xeira de problemas técnicos na web da Axencia Tributaria
mércores, 11 de abril do 2012
O ano pasado pasou o mesmo e nada hai que
indique que agora non aconteza algo semellante, se cabe aínda con máis
intensidade. Falamos da posta en marcha, ao abeiro da web
da Axencia Tributaria, do prazo para a presentación en liña dos borradores
da renda 2011. E falamos tamén dos inevitábeis problemas técnicos, que xa se
deron en anos anteriores e que desta volta, con máis xente facendo vida na Rede
e querendo usar as vantaxes da eAdministración, semella que se intensificaron
un chisco. Segundo informa Efe na prensa galega
reflectindo fontes do dito organismo estatal, no primeiro día deste proceso xa
se confirmaron preto de 30.000.
Asemade, tamén se lle deu cumprimento a 103.264
solicitudes do sistema REN0, un método para obtermos de contado o borrador e os
datos fiscais por Internet. Como dixemos, déronse as inevitábeis incidencias técnicas.
Así, a web rebordou perante o fluxo de solicitudes dos contribuíntes, en boa
medida co obxectivo de obter canto antes as súas respectivas devolucións
(nestes tempos que corren máis necesarias ca nunca). De feito, a estas alturas
é moi posíbel que siga colapsada a devandita función REN0, que nos terá
agardando durante uns segundos coa esperanza de que estea operativa, e logo
deparándonos a mensaxe temida: “Produciuse
un problema”. O mesmo ocorre co resto das funcións relativas co borrador. Segundo
informa a AEAT, este ano poranse a disposición dos cidadáns 22 millóns de
borradores e datos fiscais. Asemade, a previsión é de que oito millóns de
persoas aposten por tirarlle partido a REN0. A gran vantaxe disto e de facer tódolos
trámites por Internet é que nos achega moita máis rapidez que polas canles
habituais, e coa gran vantaxe de que non é preciso facer acto de presenza nas
oficinas da Axencia. Por certo que xa podemos solicitar e confirmar o borrador
da declaración 2011 dende hoxe e até o vindeiro 2 de xullo.