Conecta PEME leva as axudas a innovación ás empresas de menor tamaño
martes, 17 de setembro do 2013
Logo
da segunda edición dos fondos FEDER-Innterconecta, as nosas empresas
innovadoras teñen ao alcance da man novos e complementarios recursos
de apoio para as súas estratexias creativas e de autoimpulso.
Falamos de Conecta PEME, un novo programa que
mobilizará este ano 25 millóns de euros entre investimento público
e privado, e que foi presentado este martes en Santiago polo
conselleiro de Economía, Francisco Conde, ante ducias de compañías
na sede da Confederación de Empresarios de Galicia. En virtude
destas novas achegas, salientou, máis de 100 pequenas e medianas
empresas da nosa terra terán importantes apoios para levar a cabo os
seus proxectos.
E
engadiu, referíndose aos devanditos fondos Innterconecta, a partir
dos que o novo programa traza unha liña de continuidade: “O
plan
está deseñado para completar o
labor
dun dos programas clave da innovación galega, o Innterconecta, que
nas súas dúas edicións está a mobilizar en Galicia 210 millóns
para financiar os proxectos de 400 empresas”. En
boa medida, explicou, Conecta PEME xorde para resolver as certas
dificultades que algunhas empresas pequenas do noso país teñen para
acceder aos apoios de FEDER-Innterconecta. A través do novo programa
que achega a Axencia Galega de Innovación (GAIN) ponse en xogo un
mínimo esforzo investidor de
600.000 euros, en troques
dos 1,5 millóns do Innterconecta. “Ademais”, engadiu
Conde,
“dada a actual situación de liquidez, as empresas contarán con
apoios desde o primeiro momento, sen esperar a resolver as trabas
burocráticas para acadar a axuda do Goberno galego”. Desta
maneira, indicouse,
GAIN aportará un financiamento de entre o 50% e o 80% do total dos
proxectos, e uns anticipos do 50% da súa axuda.