Compostela presenta nova aplicación para facer máis accesíbeis os servizos sociais
xoves, 23 de febreiro do 2017
Santiago presentou esta semana unha nova
ferramenta informática para facilitar ao día a día dos cidadáns
(unha ferramenta desenvolvida e achegada ao abeiro do que se coñece
como Administración Electrónica). Trátase,
máis en detalle, dunha aplicación de solicitude de cita previa para
servizos sociais municipais. O recurso tecnolóxico foi dado a
coñecer pola concelleira de Políticas Sociais e Diversidade, Concha
Fernández, quen salientou que a cidadanía pode facer uso del a
través da web municipal (portada ou Concellaría de Políticas
Socias) ou ben a través da dirección
citapreviass.santiagodecompostela.gal.
A ferramenta, dixo, vén a completar o sistema que había para a
solicitude de cita (até o de agora os usuarios debían solicitar
atención por teléfono ou de maneira presencial). “A idea”,
sinalou, era “facer máis accesíbeis os servizos sociais
comunitarios, non saturar a atención telefónica nin os puntos de
atención".
Na rolda de presentación tamén participou a
técnica responsábel do aplicativo, Ana Ares, quen destacou a
“linguaxe sinxela que se utiliza e que fará que moitas persoas,
aproximadamente o 30% do volume de usuarios actuais, usen nun
primeiro momento este novo sistema”. Tamén engadiron que a
ferramenta nace con tres obxectivos: axilizar o acceso á veciñanza
aos servizos sociais comunitarios; contribuír á organización do
centro municipal de servizos sociais e apoiar aos e ás profesionais
dos servizos sociais no desenvolvemento do traballo diario. Segundo
fixeron saber, un dos seus puntos fortes da aplicación é a
sinxeleza: a través do enderezo electrónico, as persoas usuarias
dos servizos sociais do Concello poden pedir cita co seu profesional
e a aplicación amosará as horas libres existentes.