Como ser máis competitivos co Big Data, ao detalle nun curso de FEUGA

A Fundación FEUGA, con sede operativa no Campus Sur de Santiago, vai organizar o 16 de marzo o curso Big Data e a Analítica Preditiva, incidindo nas metodoloxías máis acaídas para aplicar estas tecnoloxías (as tecnoloxías que espremen e poñen orde na información a gran escala co fin de tirar ideas de proveito para o noso día a día empresarial e investigador). O curso, de oito horas, celebrarase na sede de FEUGA en Compostela, en horario de 9.30 a 14.30 e de 16.00 a 19.00 horas.
Ao abeiro desta actividade formativa analizaranse polo miúdo das posibilidades dos datos a gran escala para achegarnos pautas de optimización empresarial, competitividade, rendibilidade e eficiencia.
En palabras de FEUGA, “é preciso saber extraer a máxima información dos datos para poder así mellorar a toma de decisións, e máis tendo en conta que a importancia do coñecemento como un activo adicional que, de traballalo da maneira axeitada, pode mellorar calquera proceso de negocio e axudar a identificar novas oportunidades”. En definitiva, o curso poranos ao tanto das actuais técnicas da analítica de Big Data e aprendizaxe das máquinas (Machine Learning), dous conceptos clave que sustentan en boa medida a actual revolución da información no ámbito dos negocios.