Comeza este mércores a edición 2014 do campionato galego de modelado en 3D co teléfono móbil
martes, 7 de xaneiro do 2014
A edición 2014 do campionato mundial de modelado 3D
de precisión con móbil (D3mobile
Metrology World League), un
certame dirixido a fomentar a cultura e a vocación científica
entre os máis novos a través dos móbiles e as súas
potencialidades como ferramentas de deseño de achegas tecnolóxicas
e industriais, bota
a andar este mércores, a partir das 12.00 horas, na sala de
xuntas da Escola Politécnica Superior do campus de Lugo. Alí,
investigadores do grupo USCAN3D da USC, promotores deste proxecto que
conta co apoio da operadora Vodafone, presentarán ao público a
iniciativa.
O director deste proxecto, o profesor da
Universidade Juan Ortiz Sanz, amosará polo miúdo tódolos detalles
e implicacións deste torneo, mais de explicar as súas bases e
obxectivos. Na cita estarán presentes tamén o vicerreitor de
Innovación e Investigación do campus de Lugo, Pablo Ramil; o
director da Escola Politécnica Superior, Javier Bueno, e o delegado
de Cultura, Turismo, Ensino e Normalización Lingüística da
Deputación Provincial de Lugo, Mario Outeiro.
Segundo fai saber a institución académica
compostelá, a profesora e coordinadora do grupo de investigación da
USC para a Documentación en 3D, Mariluz Gil Docampo, e Santiago
Moreno, director xeral da Fundación Vodafone España, un dos
patrocinadores desta iniciativa de fomento da cultura científica e
da innovación avalada tamén pola Fundación Española para a
Ciencia e a Tecnoloxía (FECYT), tamén participarán na presentación
da D3mobile Metrology World League 2014.
A edición a presentar este mércores é a segunda
entrega da competición. Como particularidade para esta nova andaina
e segundo avanzan os seus organizadores, este ano buscarase “acadar
unha dimensión máis internacional, abrindo o certame á
participación de estudantes de todo o mundo e achegando un
desenvolvemento íntegro na Rede”.