Chega este sábado a PonteGovJam, edición galega dun reto mundial para o deseño de servizos
venres, 6 de xuño do 2014
- Os participantes na anterior edición do encontro pontevedrés
Este sábado 7 de xuño dá comezo en Pontevedra o
encontro PonteGovJam, unha
iniciativa da que xa falamos os días pasados dando de que se trata
da edición galega dunha xuntanza internacional dirixida a cidadáns,
funcionarios públicos e especialistas en innovación co
obxectivo de retalos a deseñar e dar forma a servizos públicos de
Cidades Intelixentes e eAdministración en só 48 horas.
PonteGovJam intégrase polo tanto no evento mundial Global
GovJam e participa no reto común que este evento propón: un
reto que se vai comunicar ao longo deste venres e que mobilizará aos
participantes para pór o seu gran de area no desenvolvemento do
sector público.
A actividade dará comezo ás 9.30 horas, estando
prevista a presentación dos proxectos arredor das 19.30 horas. Entre
mentres, explorarase o reto (arredor das 11.00), xerarase ideas
(arredor das 12.30) e abordarase o seu deseño e aplicación (das
16.00 en adiante). En total formalizaron a súa presenza 30
participantes. Por certo que ás 19.30 horas, amais da presentación
de proxectos, está previsto entregar os recoñecementos á
iniciativa máis orixinal, á máis creativa, á máis solidaria, á
que achegue a mellor experiencia de cliente e ao proxecto máis
viábel.
O evento de Pontevedra celébrase de xeito
simultáneo en case medio centenar do países. A primeira experiencia
piloto, informan os organizadores do certame, foi levada a cabo no
ano 2012 polo Goberno australiano en colaboración coa empresa alemá
Work Play Experience, contando coa participación de máis de 30
cidades en 5 continentes e da que xurdiron máis de 120 proxectos e
prototipos. Os países que participarán nesta edición por agora
son: Brasil, Canadá, Chile, Colombia, Alemaña, Singapur, España,
Corea do Sur, Suíza, Taiwan, Dubai, Gran Bretaña e Estados
Unidos.
Os obxectivos da xornada son “potenciar a capacidade
creativa para a resolución dun reto común aplicando ferramentas
enfocadas a fomentar a innovación nas administracións e no sector
público; adquirir coñecementos sobre novas tecnoloxías e
metodoloxías relacionadas coa innovación nas organizacións dunha
forma divertida, motivadora e estimulante; fomentar o traballo en
equipo e o networking entre profesionais; e xerar servizos e
construír prototipos”.
Trátase da segunda vez que o evento se
celebra en Pontevedra (o mes de marzo), e para os que queiran facerse
unha idea de en que consiste exactamente, dicirlles que na
web da xuntanza hai un vídeo habilitado na Rede a xeito de crónica.
O encontro pontevedrés celébrase en Espazo Arroelo, empresa
organizadora da experiencia en Pontevedra. Arroelo é un acubillo de
coworking xestionado por María Pierres e África Rodríguez
que nace co fin de dar resposta á demanda dun lugar común de
traballo para autónomos e PEME. Arroelo púxose en marcha en 2013 e
actualmente ao redor de 36 persoas co-traballan nel. Ofrece aos
participantes o espazo, materiais e o apoio dunha serie de
profesionais de apoio con experiencia no desenvolvemento de
proxectos, como son Pablo López, Raquel Pedrouso, José Romero
Crusat, Diego Parajó e Roberto Pérez Marijuan, expertos en
desenvolvemento de proxectos e adestramento. No desenvolvemento do
encontro participan como colaboradoras as empresas que forman parte
de Espazo Arroelo: Sofía Martínez ReY, Lucía Rodríguez, Les
Siamoises, O Espello Máxico Producións, Al Lío, Elefantes de
Cacharrería, Til Diacrítico, Comunicamos, Zoraida Ferreras e
Pepinho Quintela.