Chega á recta final o prazo de inscrición para o certame de Ideas Innovadoras da USC

A Universidade de Santiago, a través da iniciativa Uniemprende (dirixida a acurtar a distancia entre a idea de mercado abrollada nas Facultades e a súa materialización real), puxo en marcha a doce Edición do Concurso de Ideas Empresariais Innovadoras. Este certame, cuxo obxectivo de premiar á comunidade das tres universidades galegas polas súas contribucións con novas propostas á modernización do noso tecido produtivo, vén este ano con cinco premios de 600 euros. Para quen estea interesada/o en participar no concurso, dicirlle que terá que formalizar a súa concorrencia antes do 31 de maio e que as bases e os formularios de inscrición están habilitados na web de Uniemprende.
As áreas de coñecemento a cubrir polos galardóns, lonxe do que se podería pensar, van alén do puramente tecnolóxico ou estritamente dixital, abranguendo Ciencias da Saúde, Humanidades, Ciencias Xurídicas e Sociais, Ciencias Experimentais e Ensinanzas de tipo Técnico. Como dixemos, o prazo de presentación para as inscricións no certame pecha o 31 de maio. O xurado do concurso está integrado por representantes da Universidade de Santiago e de entidades colaboradoras, sendo os criterios a valorar a viabilidade da idea, a innovación que pon en xogo, o seu grao de madurez, a súa potencialidade no mercado e a súa aposta polas políticas de igualdade.