Chega a Galicia o programa NEW de Red.es

A entidade pública Red.es e Nominalia, rexistrador de dominios e provedor de servizos de Internet para empresas, están a celebrar, en Santiago de Compostela, unha xornada de sesións informativas para darlles a coñecer ás pequenas e medianas empresas a importancia da súa presenza en Internet e o emprego das súas ferramentas básicas.
Esta xornada informativa, que se enmarca dentro do ciclo itinerante do programa NEW (iniciado o pasado 11 de setembro en Talavera de la Reina), realizase na Asociación da Área Empresarial do Tambre en varias sesións: 10:30, 12:30, 14:00 e 17:30 horas.
O obxectivo do devandito programa é promover a presenza en Internet das pequenas e medianas empresas españolas así como explicarlles ós representantes empresariais que asistan ó encontro, o manexo e a optimización dos instrumentos de traballo básicos.
Para estas xornadas de información, que se prolongarán ata decembro de 2007, Nominalia pon a disposición de Red.es un equipo de expertos que lles ofrece asesoramento e soporte técnico ás PEMES, mostrándolles as claves para deseñar as súas propias páxinas web e orientando as empresas sobre como situar os seus negocios na rede.
No paquete de servizos que a empresa Nominalia lles ofrece ás pemes como provedor oficial do programa NEW, atópase o aloxamento dun dominio propio con 13 contas de correo asociadas ó mesmo, e a provisión das ferramentas necesarias para a creación dunha páxina web propia. A participación no programa NEW está aberta a empresas cun persoal inferior ós 250 empregados. Ademais, paralelamente ó ciclo de xornadas divulgativas, que está percorrendo todas as comunidades, Red.es puxo a disposición das pemes unha liña telefónica gratuíta de atención e asesoramento permanente (900 22 33 22). O calendario do ciclo de charlas pode ser consultado en www.programa-new.es.

A seguinte escala, tras Santiago, é A Coruña, onde se promocionará o programa o martes no Centro Municipal de Emprego do Polígono dos Rosais.