Chega Appvise, ferramenta para loitar directamente contra o acoso nas escolas
xoves, 3 de marzo do 2016
Entre os servizos e
aplicacións que proliferan co obxectivo común de acadar navegacións
máis seguras e unha Internet ateigada de valores positivos, ceibe de
violencia, atópase unha plataforma que “promete” afianzarse en
ámbalas beiras do Atlántico. Trátase de Appvise,
en palabras dos seus impulsores “un servizo tecnolóxico-social
para centros educativos que ofrece ferramentas de comunicación e de
sensibilización para fomentar unha comunicación eficaz e previr e
erradicar calquera tipo de violencia como o bullying”.
Arestora, a plataforma está comezando a “loitar” contra a acoso
escolar pola vía das TIC en seis países: España, Arxentina, Chile,
Colombia, Guatemala e Estados Unidos. Os proxectos sociais de Appvise
están presentes xa en tres continentes (América, Europa e tamén
África).
Segundo fan saber os
creadores desta tecnoloxía, o proxecto Appvise é tanto un servizo
tecnolóxico como social que se apoia sobre un máis que firme plan
de responsabilidade social corporativa. A través deste, os proxectos
nos centros escolares dos diferentes países desenvólvense en
colaboración con organizacións sen ánimo de lucro e grupos de
expertos con arela solidaria.
A día de hoxe, nestas
semanas previas ao lanzamento definitivo do proxecto, o equipo de
Appvise está a traballar no fortalecemento das súas relacións
institucionais coas autoridades de Gambia, país onde se porán en
marcha proxectos de cooperación nos próximos meses. O mércores 24
de febreiro, de feito, desenvolveuse a reunión co embaixador do país
en España, Yang Labou.
A previsión dos
impulsores de Appvise é incorporar ao longo destes meses a meirande
cantidade posíbel de socios estratéxicos, “ampliando o equipo de
traballo para asegurar un crecemento sustentábel e situar o proxecto
en máis dun cento de países nun período de cinco anos.
A sede principal de
Appvise está en Madrid (Villaviciosa de Odón). A iniciativa vén da
man de Integra Technologies, empresa de innovación TIC pertencente
ao grupo CHT Holdings, con sedes en Delaware e Malta.
A aplicación
Appvise conta cunha
ferramenta de comunicación que facilita a conexión entre pais,
profesores e alumnos. Entre outras cousas, inclúe funcións de
localización, seguimento do rendemento e cualificacións do alumno
ou de denuncia anónima en casos de acoso. Ademais, segundo sinalan
os seus desenvolvedores, resolve “a comunicación de grupos
extensos de persoas de maneira organizada e nada intrusiva”.
Asemade, achega ao seu abeiro obradoiros educativos sobre diversidade
cultural, protección do medio ambiente e dereitos humanos e
prevención de violencia de xénero e acoso.