Centos de profesionais e estudantes acoden esta semana ás xornadas sobre seguridade en liña da UDC
martes, 22 de febreiro do 2011
- Chema Alonso, un dos participantes das xornadas, nun relatorio organizado polo Instituto Tecnolóxico de Aragón
A Facultade de Informática da
Universidade da Coruña está estes días celebrando os seus 25 anos de vida. Un dos eventos estrela do seu
programa conmemorativo de actividades é sen dúbida o encontro Xornadas
de Seguridade Informática 2011, unha xuntanza que se celebra esta
semana (a partires do xoves 24 de febreiro) da man do GSIC e que entre outros
obxectivos inclúe o de converterse, durante tres días, na sede internacional do
debate acerca dos diferentes recursos postos en xogo arestora para acadar unha
Rede de fiar a tódolos niveis.
Con este motivo,
as xornadas darán acubillo a boa parte do máis destacado no eido da investigación
tecnolóxico-dixital. O encontro estará aberto (tras o proceso requirido de
inscrición) a estudantes, profesores, investigadores e profesionais das novas
tecnoloxías do coñecemento. Tal é o interese suscitado polo evento, que a día
de hoxe calcúlase que participarán no mesmo arredor de cincocentas persoas.
Polo que respecta
ao programa de actividades, dicir que as xornadas contarán coa presenza de persoeiros
dos novos escenarios dixitais como Chema Alonso (ligado a Informática 64), que
afondará en diferentes aspectos da
seguridade como poden ser implantacións, auditorías, formación e técnicas de
hacking ético
Informar que a
intervención de Alonso desenvolverase o día 25 a partir das 11.35 horas baixo o
seguinte epígrafe: Adiante por favor:
Default Passwords.
Tamén
participarán como relatores nestas xornadas expertos como Ángel Prado, Rubén Santamarta, Pedro
Sánchez,
Manuel Gesteiro, Roi Mallo, Diego Ferreiro, Raúl Benito, Gildas Avoine, Marcelo
Rivero, Alejandro Ramos, Sherab Giovannini, Luciano Bello e Alfonso Muñoz.
Todos eles, engaden fontes da Universidade, expertos de primeira liña a nivel
nacional e internacional “que contribúen
coa súa participación a elevar a estas xornadas ao nivel máximo de calidade e
prestixio tanto no contorno académico como no profesional”.