Caxigo.gal colle novos azos grazas á súa integración en APRODIGA
luns, 3 de outubro do 2016
Caxigo.gal,
a rede social galega (con páxina web e
aplicación de seu), vén der fortalecer os seus alicerces de
cara a consolidar a súa andaina futura como comunidade dixital cen
por cen da nosa terra. Este impulso vén da man da Asociación pola
Promoción e Dignificación do Galego, APRODIGA, que a partir de
agora ostentará a titularidade da devandita rede social logo do
importante traballo despregado polo seu anterior titular, Marcos
Suárez, fundador e creador de Caxigo. Segundo puidemos saber, todos
os membros do equipo actual da comunidade e as novas e vindeiras
incorporacións pasan tamén a integrarse na nova titularidade. “O
noso obxectivo”, sinalan, “é seguir avanzando coa rede dunha
maneira máis profesional, medrando e mellorando en todos os sensos e
os aspectos”.
Para comezar, anuncian a
inclusión de “moitas novidades” e de novas funcionalidades que
os usuarios previamente pediran, “así como a posibilidade de
colaborar con nós, dun xeito voluntario e/ou altruísta, a través
da ligazón caxigo.gal/achegas”.
Isto, explican, “fará posíbel a continuidade e mellora da rede”.
APRODIGA lembra, para
máis información sobre o seu traballo, que se trata dunha
asociación cultural sen ánimo de lucro e que, desta maneira, non se
dirixe á obtención de beneficio propio algún. E engaden: “As
persoas que lle dedicamos tempo a este sinxelo pero engaiolante
proxecto facémolo desinteresadamente en beneficio da nosa fala, da
nosa cultura e da nosa idiosincrasia como pobo”.
Tamén aclaran que os
cambios de titularidade non afectarán, “en ningún caso”, á
continuidade nin ás condicións. “Pola contra”, explican,
“axudará a que o vieiro que comezamos a percorrer a finais do ano
2012 se vaia convertendo nunha fermosa e saudábel andaina sen
retorno; así coma nunha ferramenta para conquerir un abrente pintado
de esperanza sempre limpo de imbéciles e escuros”.