Cabify permite facer a compra online na Coruña desde a súa aplicación
mércores, 6 de outubro do 2021
A
plataforma española Cabify vén de dar un novo paso en materia de
diversificación de servizos de mobilidade sustentábel, servizos
directamente encamiñados a achegar alternativas limpas e cómodas ao
transporte tradicional nas cidades. Segundo fai saber a empresa, xa
podemos realizar a nosa compra online de produtos diarios en
supermercados a través da aplicación móbil de seu, grazas a unha
alianza estratéxica de Cabify con Lola Market, o servizo
especializado en compra online, que se integra dentro da
plataforma.
Isto
tradúcese na dispoñibilidade da opción Súper no menú
inferior da app, onde poderemos acceder ao dito servizo,
introducir o enderezo da entrega e pagar con calquera das opcións
dixitais xa cargadas no perfil de Cabify (cartón de crédito ou
débito, Paypal, Google Pay ou Apple Pay).
Esta
funcionalidade está xa operativa para todos os usuarios da Coruña,
Alacante, Barcelona, Madrid, Málaga, Murcia, Sevilla, Valencia e
Zaragoza que, segundo fai saber Cabify, “en poucos pasos van atopar
unha forma cómoda de facer a súa compra”. Por certo que para
acceder á funcionalidade debemos actualizar a aplicación á súa
última versión en Android e iOS.
Lola
Market ofrece un servizo de compra online de produtos de
alimentación permitindo realizar adquisicións en supermercados
(como Makro, Lidl, Carrefour, Mercadona, DIA, Alcampo), mercados
tradicionais e tendas especializadas.