CO2 Smart Tech amosará en Santiago as múltiples vantaxes de aforro e eficiencia da súa plataforma co2st-tem
xoves, 10 de xullo do 2014
O vindeiro xoves 17 de xullo a empresa galega CO2
Smart Tech
vai organizar un interesante evento tecnolóxico no Centro
Demostrador de TIC de Santiago, emprazado no Centro de Novas
Tecnoloxías de Galicia. A sesión, a desenvolver baixo o epígrafe
Innovación aplicada a Xestión Enerxética: a solución
co2st-tem, consistirá nunha demostración
tecnolóxica propiamente dita, ou sexa, en amosar en detalle as
vantaxes e utilidades dun software creado pola empresa con sede en
Oleiros, comercializado xa en España, Portugal e Alemaña.
Falamos da ferramenta co2st-tem,
“unha avanza plataforma web de optimización enerxética e técnica
de instalacións” que permite, entre outras cousas, que só
contando cun dispositivo conectado a Internet, teñamos acceso
permanente a avanzados recursos de visualización, análise e control
de calquera instalación.
Respecto á cita do
17 de xullo, o programa inclúe un repaso polos beneficios de
implantarmos unha plataforma de xestión enerxética (redución de
custes, impacto na conta de resultados) e polas vantaxes adicionais
do sistema específico co2st-tem, unha demostración tecnolóxica do
funcionamento da plataforma e unha quenda para rogos e preguntas. A
sesión vén da man de Alberto Méndez Davila (director e
socio fundador da empresa), Gema Rodríguez (responsábel de
Financiamento) e Mario Rivera (enxeñeiro de Proxectos). O evento
desenvolverase entre as 10.00 e as 13.30 horas e está dirixido sobre
todo a directivos e técnicos con responsabilidade sobre aspectos
económicos e/ou de xestión técnica en empresas industriais e do
sector servizos (edificios administrativos, hoteis, centros
comerciais, centros deportivos...).