CIE leva da man aos empresarios de Compostela cara a un modelo práctico de aforro enerxético
venres, 28 de marzo do 2014
A empresa CIE
Tecnoloxías, con sede en Arteixo, estivo este xoves en Santiago
impartindo unha xornada sobre aforros enerxéticos e, máis polo
miúdo, sobre os recursos tecnolóxicos dos que dispón para
favorecer esta eficiencia no emprego de recursos (hoxe en día, coa
crise e coa tarifa de luz polas nubes, máis precisos ca nunca). Os
profesionais de CIE, empresa
da que xa temos falado en Código Cero dando conta doutras
presentacións dos seus produtos en Compostela, avaliaron na cita
cos profesionais da capital de Galicia e contorna a situación do
mercado actual enerxético. Lanzaron a seguinte pregunta: A que se
debe o incremento dun 70% no custe da luz dos últimos cinco anos
cando a demanda se contrae e estamos a demandar a metade da potencia
instalada?
Estas e outras cuestións
a tratar, informa CIE, fixeron que o acto contase con gran presenza
de profesionais e empresarios locais, “aos cales as devanditas
tarifas estanlles a acaparar unha porcentaxe moi importante dos
gastos de explotación”, sinala a firma de Arteixo.
Trala xornada os
directivos de Compostela puideron aclarar as dúbidas nas cales
estaban mergullados tralas novas que se están a publicar nos últimos
meses respecto á nova suba do custe de electricidade, unha de
tantas. Por outra banda, os responsábeis de CIE amosáronlles tamén
o cadro de mandos que poden empregar para monitorizar e xestionar os
custes enerxéticos mediante os sistemas de telexestión amosados
pola empresa con sede en Arteixo, a cal esta a desenvolver nestes
últimos anos un gran esforzo non ámbito da eficiencia. Este esforzo
e esta aplicación de coñecemento materialízanse, entre outras
cousas, no despregue de solucións TIC para a xestión enerxética
das empresas a través dun dispositivo intelixente smartphone
ou un computador persoal. Lembrar que dentro das áreas de negocio de
CIE salientan as infraestruturas físicas (centros de datos, sistemas
de control e acceso, ...), comunicacións unificadas (VoIP,
electrónica de rede, sistemas de seguridade, ...) e servizos de
enxeñería, soporte e mantemento.