Bueu prepárase para dar paso á Administración Electrónica
venres, 15 de xullo do 2016
O Concello
de Bueu vén de dar comezo ao período de formación das súas
traballadoras e traballadores con vistas á posta en marcha da
iniciativa local de Administración Electrónica. O proceso de
adaptación á nova contorna dixital (que fornecerá máis
transparencia e comunicación e máis facilidade e eficacia nos
procedementos coa veciñanza) comezou este xoves da man da empresa
Auloce, encargada da xestión do proxecto de eAdministración, unha
achega coa que o Concello de Bueu quere adaptarse plenamente á Lei
11/2007 do 22 xuño, de Acceso Electrónico dos Cidadáns aos
Servizos Públicos.
Segundo informa o
Concello, o persoal técnico de Auloce está a explicar aos
traballadores municipais, tanto en grupo como individualmente, o
funcionamento da plataforma electrónica que se compón de tres
módulos: o de xestión administrativa (rexistro de entradas e
saídas, rexistro de facturas, dixitalización, sinatura electrónica,
catálogo de procedementos, xestión documental, arquivo e
conservación, aplicacións para dispositivos móbiles e libros
oficiais electrónicos, o de sede electrónica (taboleiro de
anuncios, perfil do contratante, verificación de documentos
electrónicos, consulta de expedientes, notificacións electrónicas,
pago telemático, portal de transparencia), e o módulo de
interoperabilidade (integración dos sistemas, plataformas,
aplicacións e ferramentas propias do concello alleas á
organización).
A inclusión da Administración Electrónica,
engade o Concello, “posibilitará un mellor acceso á documentación
tanto a nivel interno como para facilitar os trámites da cidadanía”.