Brión lanza aplicacións para amosar ao mundo o seu potencial turístico
luns, 16 de maio do 2016
O Concello de Brión vén de lanzar unha
aplicación gratuíta para dispositivos móbiles destinada a amosar o
mundo os reclamos e potenciais turísticos do termo municipal
coruñés. A ferramenta, compatíbel con smartphones
e tabletas, permite aos usuarios atopar todos os datos que precisen
sobre os principais atractivos de Brión, “posibilitando a
localización xeográfica e a visualización en imaxes dos mesmos”.
E todo, engaden fontes do Concello, “dun xeito atractivo” e
primando a sinxeleza. A aplicación xa se pode descargar para
sistemas
Android na tenda Google Play e tamén para
iOS. Igualmente, está accesíbel na páxina web
municipal, concellodebrion.gal.
Segundo destaca o Concello ao fío dos esforzos
postos en xogo para facela o máis doada posíbel, unha vez
descargada e instalada, os usuarios poden comezar a usala “de xeito
inmediato, sen máis requirimentos”. Ademais, os contidos do menú
aparecen artellados de maneira intuitiva e de doado manexo:
Arquitectura arqueolóxica (castros, megálitos, etc), Arquitectura
civil (pazos, pontes, fontes, etc), Arquitectura militar (castelos),
Arquitectura relixiosa (igrexas, capelas, cruceiros, etc), Patrimonio
cultural, Patrimonio natural, Onde comer, Onde durmir, que facer
(festividades, exposicións), Que ver (escolma de imaxes de lugares
de interese turístico) e Servizos (servizos municipais, sanidade,
emerxencias, hostalería, farmacias, etc).
Segundo lembra o Concello, en cada unha das
categorías aparecen distintos lugares que podemos seleccionar para
acceder ás fichas individuais de cada elemento. Nesas fichas figuran
datos de interese, imaxes dos lugares, a súa localización
xeográfica, así como a posibilidade de visualizar como chegar a
eles grazas ao Google Maps. O acceso aos contidos pode facerse en
galego e castelán, seleccionando a lingua preferida premendo na
icona de configuración para cambiar o idioma do programa.
Ademais do devandito, e co obxectivo de ir
mellorando a ferramenta coa axuda de quen lle tire proveito, o
Concello de Brión puxo unha conta de correo a disposición da
veciñanza e dos usuarios da aplicación para que realicen suxestións
de cara a solucionar carencias e corrixir posíbeis eivas ou
atrancos. As suxestións deberán achegarse ao enderezo de correo
appconcellodebrion@gmail.com.
A
aplicación foi desenvolvida pola firma Sixtema para o Concello de
Brión, que é a entidade encargada de administrar os contidos.
Segundo destaca o Goberno local, esta nova app compleméntase
arestora con Brión en rutas, que é outro recurso móbil que
permite descubrir o termo municipal a través de tres roteiros: a
Ruta das Igrexas e Cruceiros (que percorre Brión “de
principio a fin descubrindo” a súa rica arquitectura relixiosa), a
Ruta Arqueolóxica (castros, mámoas, pontes, as Torres de
Altamira... Trátase dun percorrido pola historia local, “cargada
de misterio”) e a Ruta turística de carácter xeral que nos
leva polo “esencial” do concello.
Brión
en Rutas foi desenvolvida pola empresa Ubiplay Mobile e funciona
dun xeito distinto da anterior. Segundo informa o Concello, cando a
executamos no noso dispositivo móbil, e grazas ao sistema de
localización GPS, sitúa a nosa posición actual nun mapa xunto cos
puntos de interese clave de cada unha das rutas recollidas nesta
aplicación. Seleccionando un destes puntos, poderemos navegar cara
el dentro da propia aplicación ou a través de Google Maps. En canto
cheguemos ao punto de interese procurado a ferramenta actualizarase
de maneira automática e amosaranos os datos precisos sobre o lugar
no que nos atopamos.
Tanto a
aplicación como os contidos das tres rutas están dispoñíbeis en
tres idiomas (galego, castelán e inglés). Porén, destacan dende o
Concello e dende Ubiplay, é quen de adaptarse de forma automática
ao idioma que ten configurado o usuario no teléfono.