Brión amplía o número de cursos formativos en liña
luns, 1 de febreiro do 2010
O Concello de
Brión, que o pasado mércores anunciaba nesta web a celebración
de varios cursos de formación en liña e de balde para tódolos veciños e
veciñas da localidade, atopouse esta semana cunha grata sorpresa ao comprobar
que preto de cen persoas (concretamente un total de 97) xa tiñan solicitado a súa
praza en tan só cinco días dende que se abrira a convocatoria.
Ante a demanda rexistrada, os responsables desta
iniciativa non tiveron máis remedio que ampliar o número de cursos de formación
en liña e iniciar de inmediato os nove cursos que xa cubriron o número de
prazas requeridas.
Asemade, os organizadores tiveron que abrir unha lista
de espera para levar a cabo, segundo afirman, “polo
menos outros nove cursos máis”, que ao igual que os
primeiros, serán de balde para tódalas persoas interesadas e que comezarán en
canto haxa un mínimo de dez persoas inscritas.
Deste xeito, os
cursos que comezarán no mes de febreiro serán os catro do entorno Office
(Excel, Power Point, Word e Access), o de Linux, o de Internet Explorer, os de
contabilidade (Contaplus, Nominaplus e Facturaplus) así como os de Photoshop e
Dreamweaver. A gran demanda rexistrada nestes nove cursos fixo que o Concello
de Brión decidise abrir unha nova convocatoria para os mesmos, cunha lista de
espera na que os veciños interesados se poden anotar a través de Briondixital.
