Bren afronta novos retos técnicos cun pioneiro plan de I+D+i

A produtora compostelá Bren Entertainment S.A. pertencente ó grupo empresarial Filmax Entertainment, vén de anunciar o desenvolvemento de dous proxectos de I+D+i para a mellora da produción e a automatización de procesos de animación.
Trátase de Miolo, unha ferramenta de control, xestión e optimización do fluxo de traballo e bren Toolkit, un bloque de ferramentas en 3D que trata de responder aos retos técnicos do mercado.
O devandito proxecto conta coa colaboración da Consellaría de Innovación e Industria a través do Programa de Sociedade da Información do Plan Galego de I+d+i, que achegará un total de 126.618 euros para financiar o 40 por cento do custo total do investimento.
Ambos proxectos forman parte dun plan de I+D+i que iniciou a produtora compostelá hai dous anos e que rematará durante 2008. Os responsables de innovación de Bren indican que o traballo que o departamento de I+D+i está a facer nestes momentos responde “á vocación investigadora da empresa dende a súa creación no ano 2000” e “á convicción de que a investigación engade valor no mercado”.
O obxectivo principal de Miolo é obter coñecemento sobre a forma en que funciona a produción para optimizar recursos e perfeccionar o fluxo de traballo, mentres que o brenToolkit é un conxunto de ferramentas de xeración de gráficos tridimensionais que xorde para mellorar o proceso produtivo e responder aos retos técnicos do mercado audiovisual.
Nova ferramenta para a animación facial
Dentro do proxecto inclúese tamén a ferramenta de Recoñecemento da fala e sincronización labial mediante a aplicación de técnicas de intelixencia artificial en colaboración co Grupo Integrado de Enxeñería da Universidade de A Coruña que coordina Richard Duro.
Grazas a este desenvolvemento, os operadores de animación non teñen que realizar todo o proceso de animación facial dende cero para sincronizar os movementos da boca coa voz da dobraxe, senón que soamente teñen que proporcionar o audio e automaticamente sincronizaranse os movementos labiais. Este sistema automático de animación ten en conta desde a entoación de cada frase ata as consideracións artísticas do proxecto, que poden requirir unha sincronización máis exacta ou tratarse de movementos pouco realistas.