Braga acolle en abril o Fórum Internacional das Comunidades Intelixentes, FICIS

O Fórum Internacional das Comunidades Intelixentes e Sustentábeis, FICIS, terá lugar entre o 16 e 19 de abril en Portugal, máis polo miúdo en Braga. Este encontro dará acubillo a especialistas, líderes de opinión e directivos empresariais do ámbito tecnolóxico europeo, todos eles debatendo e afondando en casos concretos de innovación 2.0 e nos camiños a seguir para obter vilas e cidades máis e mellor conectadas, máis rendíbeis, sustentábeis e respectuosas co medio e os recursos.
Segundo informan os organizadores, “os parceiros estratégicos terão a oportunidade de divulgar as suas atividades, integradas com os fatores chave de competitividade, no domínio das comunidades inteligentes e sustentáveis, em termos de coesão social e territorial”.
Os obxectivos, por certo, tamén nos collen de preto aos galegos. De feito, búscase tamén afianzar a Eurorregião Norte de Portugal-Galiza como “um pólo de atracão de dimensão internacional no domínio das comunidades 2.0”, estimulando ao máximo os vencellos entre os dous países irmáns e emprazándoos como centros de excelencia con capacidade de xuntar e atraer investimentos e impulsar máis innovación.