Biodiversidade.eu acubillou xa 2.600 observacións de 262 especies
mércores, 8 de outubro do 2014
Coa Rede tamén se
protexe o medio. Mellor dito: a Rede é xa, con toda probabilidade, a
ferramenta de comunicación e información máis usada pola cidadanía
para dar conta dunha especie a preservar ou defender, dun ecosistema
ao que cómpre blindar ou dunha agresión á natureza da que é
preciso informar. É coma o altofalante que lle falta a que non pode
falar, e amais con conexións directas co mundo. Froito deste
compromiso medioambiental e desta confianza nas redes sociais e
Internet é Biodiversidade.eu,
unha plataforma-acubillo para o noso medio da
que xa falamos en Código Cero con motivo da súa presentación e
que agora vén de acadar un fito a ter moi en conta: superar
a liña das 2.600 observacións de 262 especies vexetais e animais ao
longo do seu primeiro ano de actividade.
A iniciativa, como
lembraremos, vén da man do grupo de investigación do Departamento
de Botánica da Universidade de Santiago (USC). O seu obxectivo foi o
de desenvolver unha base de datos que, á vez, fose unha comunidade
de usuarios arredor da protección da biodiversidade
galego-portuguesa. O espazo web acubilla recursos como novas
compartidas, arrigos, roteiros e denuncias de ameazas. Asemade,
permite a consulta de unidades didácticas. Dada a súa natureza
colaborativa e á arela de facer comunidade, ten presenza de seu nas
redes sociais (Biodiversidade
Gz-Pt en Facebook e @biodiv-gnp).
Segundo informan os responsábeis da súa posta en marcha, con este
outono Biodiversidade.eu comeza “unha nova etapa para chegar ao
maior número posible de persoas e así contribuír, de xeito
colectivo, á conservación dos nosos valores”, explica o director
do grupo Santiago Ortiz Núñez.
Lembrar que a
comunidade-plataforma é o resultado do proxecto Biodiv_GNP,
financiado con fondos FEDER do programa de cooperación
transfronteiriza POCTEP. No referente á flora ameazada, eixo do
proxecto orixinal desta proposta, a base de datos xa recolle a
información coñecida sobre a presenzas das especies ameazadas e/ou
endémicas, distribucións nas que se basearan os mapa das máis de
100 especies que incluirá o Libro Vermello de Flora Ameazada de
Galicia e Norte de Portugal. Algunhas das citas incluídas sinalan
novas poboacións ou núcleos de presenza, como os relativos a
especies como Genista ancistrocarpa, Erodium maritimum,
Rumex ruspestris, Xiphion boissieri e Succisa
pinnatifida.