Balidea impulsa unha proposta para xestionar o tráfico con Intelixencia Artificial
martes, 24 de decembro do 2019
A
mobilidade sustentábel e segura é un dos grandes desafíos que
teñen por diante as administracións. A convivencia de coches,
buses, taxis, peóns, repartidores en bicicleta, patinetes eléctricos
ou segways non é doada. Se a isto lle sumamos horas puntas
como a saída dos colexios, condicións meteorolóxicas adversas,
obras na vía ou outras circunstancias puntuais a cousa complícase.
A empresa galega do sector TIC Balidea
xunto con FISEGVI, centrada na
seguridade viaria, propoñen unha solución para manexar todas estas
variábeis con Intelixencia... Artificial.
Propoñen
Traffic
On Cloud, un sistema con capacidade para captar e analizar
imaxes de vídeo en tempo real e proporcionar información moi
valiosa sobre todos eses factores que inflúen no tráfico: fluxos,
traxectorias, tipos de vehículos, incidencias ou inclemencias. A
ferramenta está baseada no uso de técnicas de Visión e
Intelixencia Artificiais para realizar unha análise avanzada da
situación que permita facilitar e axilizar a toma de decisións.
“Hoxe
en día a xestión e estudo da mobilidade presentan continuos
desafíos derivados das novas formas e modos de desprazamento, sobre
todo no ámbito urbano, que ademais requiren respostas rápidas”,
explica Álvaro Louro, CEO de FISEGVI. Establecer regulacións e
contornas seguras nas que poidan convivir todos as maneiras de
desprazarse require, segundo os impulsores do proxecto, de “análises
de datos tamén áxiles, fiábeis e non intrusivas”.
Na
procura dunha mobilidade eficiente
Aproximándose ao concreto, que tipo de información achegaría
Traffic On Cloud? “Permite contar e clasificar o tráfico e, a
partir de aí, por exemplo, detectar vehículos prohibidos nunha zona
determinada, como vehículos pesados en determinadas zonas urbanas”,
relata Ismael Menéndez, coordinador do proxecto en Balidea. Así
mesmo, pode detectar vehículos mal aparcados, identificar vehículos
sospeitosos ou buscados polas forzas de seguridade ou clasificar o
tráfico.
Pero,
como contribúe a ferramenta a ordenar o tráfico? Os responsábeis
de Balidea e FISEGVI cóntano deste xeito: “Se sabes a intensidade,
os fluxos e as traxectorias do tráfico nunha zona determinada, como
poden ser as entradas e saídas dunha localidade, podes tomar as
medidas para desvialo por vías alternativas”.
Pola
súa banda, o experto en Intelixencia Artificial de Balidea, José
Luis Prado, explica como se fai todo isto. “A detección de
obxectos ou vehículos e a súa clasificación baséase en técnicas
de Visión Artificial (VA) complementadas con tecnoloxías avanzadas
no eido da Intelixencia Artificial (IA), que permiten a determinación
efectiva dos mesmos en diferentes condicións: día, noite, chuvia ou
condicións atmosféricas adversas dentro duns límites ou
tolerancias”. Segundo este experto, a VA realiza unha análise das
imaxes e a IA encárgase de xerar unha predición, “permitindo
distinguir diferentes obxectos na escena de observación cun grao de
acerto óptimo”.
O
sistema podería enviar alertas aos responsábeis da xestión da vía,
aos servizos de seguridade e emerxencias ou mesmo a persoas usuarias
condutoras que dispuxesen da app. Deste xeito, sería sinxelo
avisar, por exemplo, dun atasco, de velocidade reducida ou dun
accidente.
“Xa
sexa co obxectivo de posibilitar a xestión en tempo real ou de
planificar desenvolvementos urbanísticos e políticas de mobilidade,
a ferramenta proporciónalles aos xestores a información que
necesitan para a toma de decisións e a adopción de medidas
concretas”, completa Álvaro Louro.
Unha
solución polivalente e económica
Os
seus creadores subliñan que este sistema ten moitas vantaxes a nivel
de usabilidade, fronte a outros utilizados actualmente para cubrir
algunha das necesidades que abrangue a solución. “Por exemplo, a
contaxe de vehículos con espiras require máis recursos tanto para a
súa implantación como para a análise e interpretación dos datos”,
comenta Ismael Menéndez. Aseguran que as funcionalidades avanzadas,
como a análise de fluxos e traxectorias, só alcanzan un alto grao
de exactitude con ferramentas de análise de imaxes como Traffic On
Cloud.
“A
gran vantaxe da solución é a súa polivalencia”, afonda o seu
compañeiro de FISEGVI, quen indica que “se pode adaptar facilmente
ás necesidades da clientela, e ten aplicación tanto no tráfico
urbano coma no interurbano e, ademais, é compatíbel con sistemas de
visualización de tráfico xa existentes”.
Validación
en contornas reais
Traffic
On Cloud está constituído por un equipo portátil de fácil
instalación nas vías públicas e unha plataforma cloud que
ofrece unha aplicación de usuario con accesibilidade vía web. É o
resultado dun proxecto de I+D+i máis amplo, certificado polo
Ministerio de Industria, Comercio e Turismo en xuño deste ano.
O
proxecto atópase agora en fase precomercial, realizando as últimas
validacións e axustes. Xa se testou en contornas controladas e agora
estanse realizando proxectos piloto con potenciais clientes finais,
principalmente en concellos. “Para nós é moi importante agora
validalo en contornas e usos reais, coa colaboración de potenciais
clientes que nos acheguen a súa avaliación e recomendacións
especializadas”, conclúe Ismael Menéndez.