Baiona, Cambados, Ribadumia e Vilanova estrean ferramenta para avanzar en saneamento e transparencia
mércores, 21 de decembro do 2016
A sede
da Deputación de Pontevedra acolleu onte, con demostración práctica
incluída, a presentación oficial da ferramenta informática para a
xestión integrada dos saneamentos municipais, falamos de SANePLAN,
un proxecto en cuxo desenvolvemento participa a dita institución
provincial xunto ao Instituto Tecnolóxico de Galicia e a empresa
italiana Physis SRL. Segundo se fixo saber no acto, o alicerce da
aplicación é facer máis doadas as xestións e as decisións
políticas e técnicas relativas ao saneamento. Tamén se recordou
que a través de SANePLAN será posíbel facer cousas como
xeorreferenciar infraestruturas, analizar o consumo enerxético, os
custos e impacto ambiental, estudar as emisións de CO2, rexistrar e
xestionar incidencias, analizar puntos críticos da rede ou simular
escenarios futuros. O acto foi presidido polo deputado provincial
Carlos López Font e dirixiuse a achegar información e recursos
sobre SANePLAN ao persoal técnico dos concellos e das empresas dos
ámbitos da auga e o medio.
SANePLAN, segundo engadiu López font, estreouse
xa nos catro concellos orixinalmente participantes no proxecto:
Baiona, Cambados, Ribadumia e Vilanova de Arousa. Nestas vilas
analizáronse máis de 425 quilómetros de rede de saneamento co fin
de levar a cabo sesións específicas de formación sobre o
funcionamento da ferramenta cos técnicos e técnicas destes
municipios. Durante a presentación tamén se fixo unha demostración
práctica do funcionamento da nova ferramenta informática para a
xestión integrada do saneamento municipal. “A aplicación”,
lembrouse, “responde a aspectos clave que facilitan a toma de
decisións políticas e técnicas sobre estas cuestións, desde as
redes de saneamento, abastecemento ou de pluviais ata as propias
estacións de depuración”. Igualmente, engadiuse que tamén son
obxectivos de SANePLAN (entre outros) “a redución da presión
sobre as masas de auga, o desenvolvemento de sistemas de goberno
transparentes en relación á información medioambiental, así como
para adaptar o cambio climático e a racionalización dos custos de
xestión do saneamento, facilitando a súa dirección e operación
mancomunada”.
SANePLAN é un proxecto aprobado pola Unión
Europea, dotado cun orzamento de 1,5 millóns de euros para a
planificación integrada e xestión sostíbel do saneamento a través
de tecnoloxía de precisión innovadora. En concreto, a través desta
actuación estase a impulsar a integración da xestión do saneamento
e os seus elementos coa planificación urbana, co obxectivo de
mellorar o funcionamento das redes de saneamento e depuración.