Auguran que o teletraballo podería chegar en 2015 ao 40% dos españois
venres, 13 de febreiro do 2015
Este ano que
vén de comezar, a cifra de traballadores que desenvolven o seu labor
profesional a distancia vai seguir medrando de xeito considerábel.
Así nolo contan dende a división española de Arkadin,
que vén de facer un estudo sobre a situación do teletraballo no
ámbito estatal: a predisposición das empresas para apostar por
estas fórmulas, a inclinación dos profesionais, etc. Segundo se
apunta, a opción laboral en liña é a todas luces positiva para
unha empresa, xa que, entre outras cousas, “aumenta a produtividade
até un 25 %”. Respecto ao ano 2015, Arkadin prevé un importante
aumento do teletraballo en España, con arredor do 40% dos cidadáns
desenvolvendo o seu labor desta maneira.
Segundo
engade a empresa, España ten a tecnoloxía precisa para implantar e
estender esta fórmula, “reclamada hoxe polo 57 % de empregados”,
pero só o 21,8% das organizacións españolas (segundo datos de INE)
teñen hoxe en día programas de traballo remoto dentro da súa
estratexia. “Isto”, apúntase, “débese á conxuntura económica
e o medo dos directivos a facilitar esta medida”. Porén, a xuízo
de Arkadin “a realidade é que o 96 % das empresas están
capacitadas para pór en marcha esta fórmula laboral”. Ao seu
favor, xogan un importante papel cousas como o importante incremento
do número e das capacidades dos teléfonos intelixentes e das
múltiples aplicacións que permiten aos traballadores seren
produtivos dende calquera recanto.
“Todo isto
xerou un escenario laboral en proceso de cambio, onde cómpre
adaptarse”, engade a empresa, que informa tamén que aínda que as
previsións son boas para España, o país “aínda está por
debaixo do que acontece en países asiáticos como India ou China”.
De feito, segundo un informe de IDC, en 2010 en Asia había 601,7
millóns de traballadores móbiles, pero as previsións indican que
aumentará aos 838,7 millóns en 2015. Máis preto, en países como
Reino Unido o uso do teletraballo ascende ao 95% . Só un 26% dos
españois realiza algún tipo de traballo desde casa, mentres en
Europa a media é dun 35%.