Até dez polígonos coruñeses estrearán este ano velocidades de até 350 Mbps
martes, 21 de marzo do 2017
O operador
R e a axencia AMTEGA presentaron este martes as actuacións para
dotar de Internet ultrarrápida aos polígonos industriais da
provincia da Coruña, ao abeiro do Plan de Banda Larga do Goberno
galego. Estas actuacións comezaron en 2016 e desenvolveranse até
2018. No acto de hoxe, que serviu de complemento ao celebrado onte
(no
que se deron a coñecer as actuacións do Plan nos complexos
industriais pontevedreses), fíxose saber que os traballos da
compañía R (despregues de fibra óptica até o fogar, tecnoloxía
FTTH), incorporarán
10 polígonos coruñeses á listaxe de complexos galegos que en
virtude do dito Plan xa contan con velocidades de até 350 Mbps.
Estes datos foron achegados pola directora da Axencia para a
Modernización Tecnolóxica de Galicia (AMTEGA), Mar Pereira, o
director xeral de R, Alfredo Ramos, e o delegado da Xunta en A
Coruña, Ovidio Rodeiro.
Entre
outras cousas, lembraron que en 2016 os traballos equiparon con redes
de última xeración seis polígonos da provincia. A previsión en
2017 é abranguer 10 novos polígonos, estando programada a
incorporación doutros 9 en 2018.
En termos
máis concretos de características técnicas, as empresas residentes
nestas contornas estarán en disposición de contratar servizos de
Internet a través de fibra óptica cunhas velocidades de até 350
Mbps de baixada e 35 de suba, e cunha garantía de caudal do 80% sen
límite de descargas.
“Unha
vez completado o Plan”, sinalaron os participantes na rolda de
prensa de hoxe, “o 98% das superficies empresariais ocupadas da
provincia terán acceso a redes de máis de 100Mbps”. Na sesión
cos medios, AMTEGA lembrou ademais que vén de abrir unha
convocatoria de axudas para dotar de redes ultrarrápidas a empresas
e autónomos das zonas máis illadas do rural.
Na rolda,
R recordou que pon a disposición das empresas dos polígonos “a
tecnoloxía precisa para acometer a súa transformación dixital”.
Ou sexa, servizos e solucións na nube como por exemplo a
videoconferencia, o acceso á Internet das Cousas (IoT) ou os
procedementos do que se coñece como Industria 4.0, vencellados a
conceptos e metodoloxías como a eficiencia enerxética, o control de
intrusións nas edificacións, os servidores virtuais e a analítica
de datos (Big Data),
entre outros eidos. “Todas estas cousas e outras moitas máis”,
explicou a compañía de raizame galega, “son posíbeis grazas ás
vantaxes das redes FTTH (Fiber
To The Home) que levan a fibra óptica ata a propia
empresa nestes polígonos xa conectados ás redes ultrarrápidas de
R”.
Pola súa banda, Mar Pereira recordou que ao abeiro do
dito Plan, en 2016, completouse o despregue en 17 polígonos en toda
Galicia, estando previsto cubrir este ano outros 30 e en 2018 os 34
restantes. “Deste xeito”, engadiu, “no ano 2018, un total de
130 polígonos, nos que se concentra case o 93% da
superficie empresarial ocupada, disporán de acceso a redes de máis
de 100 Mpbs”.
Tamén
fixo fincapé en que para aquelas empresas que estean fóra dos
recintos fabrís ou en zonas illadas, o Plan de Banda Larga tamén
abrangue unha convocatoria de axudas para subvencionar até nun
100% os custos das tarefas necesarias para dotar de banda larga
ultrarrápida as devanditas empresas afastadas, até un máximo de
20.000€ por beneficiario.