Até 30 centros de ensino poderán sumarse este curso a Club da Ciencia
luns, 16 de setembro do 2019
Un
total de 30
centros de ensino poderán sumarse o vindeiro curso ao programa Club
de Ciencia, impulsado pola Consellería de Educación. Estes
centros sumaranse aos 91 centros que participaron no curso 2018/19 e
que verán prorrogada a súa continuidade neste programa. Esta
vontade de iniciar á rapazada na investigación e o desenvolvemento
tecnolóxico compleméntanse coa terceira edición dos Premios
Desafíos STEM: programación, robótica e impresión 3D, que
busca recoñecer o labor nos centros cos materiais e a formación
recibida nestes ámbitos.
O
obxectivo do Club de Ciencia é “estimular o espírito científico
entre o alumnado galego ao tempo que impulsar as vocacións STEM
(Ciencias, Tecnoloxía, Enxeñaría e Matemáticas) cara a estudos
posteriores nos eidos de coñecemento do ámbito científico
tecnolóxico”. En base a isto, concíbese como un espazo de
aprendizaxe “non formal” baseado nunha metodoloxía de indagación
de máxima interactividade entre docentes e alumnado.
Cada
centro docente seleccionado para desenvolver un Club de Ciencia
recibirá unha achega económica de 1.250 €. O importe máximo da
convocatoria, que conta tamén con orzamento para o continuidade dos
centros implicados no curso que acaba de rematar, ascende a 151.250
€.
As
actividades vencelladas a este programa desenvolveranse fóra do
horario lectivo do alumnado nos espazos que se consideren ou
habiliten do centro docente, cun mínimo de catro horas ao mes.
Poderán
presentar solicitudes aqueles centros docentes públicos da
Consellería de Educación que impartan ensinanzas de educación
primaria, educación secundaria obrigatoria ou bacharelato.
Este
é o cuarto ano consecutivo que se pon en marcha esta iniciativa, que
naceu como experiencia piloto no curso 2016/17 con 9 centros e que se
ampliou a 29 centros no 2017/18 e a 91 centros de ensino público no
2018/19.
Desafíos
STEM
Polo
que se refire aos Desafíos STEM, os proxectos que se
presenten aos premios deberán estar elaborados enteiramente polo
alumnado coa dotación que a Consellería realizou aos centros
públicos de ensino non universitario dende o curso 2016/17, tales
como equipamento de robótica educativa, placas de comunicación e
programación e equipo de impresión 3D. Para empregalos, o alumnado
conta cos coñecementos específicos STEM presentes nas aulas galegas
a través das distintas materias troncais, específicas e máis
concretamente nas materias de libre configuración autonómica de
Programación para a educación secundaria obrigatoria e Robótica
para bacharelato. O curso pasado participaron nesta convocatoria,
enmarcada na Estratexia Galega para a Educación Dixital, Edudixital
2020, un total de 11 centros educativos.