As xornadas ITMATI amosarán como frear andazos e evitar catástrofes botando man das tecnoloxías matemáticas
mércores, 11 de novembro do 2015
A Facultade de
Informática acolle a partir deste xoves 12 (e até o venres 13) a
terceira edición duns encontros destinados a amosar o potencial da
interrelación entre cálculo a gran escala e protección de persoas,
inmóbeis e infraestruturas de toda índole. As Xornadas
sobre Seguridade, Defensa, Tecnoloxías Matemáticas e Computacionais
veñen da man do Instituto Tecnolóxico de Matemática Industrial
(ITMATI), do que forman parte as tres universidades galegas, e contan
coa colaboración do Centro de Investigación TIC (CITIC), CESEDEN,
M2NICA e a Universidade da Coruña, entre outras institucións e
empresas. Segundo informan estas entidades, múltiples exemplos e
experiencias demostran hoxe en día que as tecnoloxías matemáticas
e de cómputo resultan “unha ferramenta clave para a innovación en
seguridade e defensa”. Por exemplo, sinalan, poden axudar (e moito)
a predicir o espallamento de andazos entre humanos.
Este tema en concreto das
epidemias será tratado por Ángel Ramos, profesor titular de
Matemática Aplicada da Universidade Complutense de Madrid, IMI. O
profesor Ramos amosará nas xornadas da Coruña os resultados das
aplicacións que desenvolveu en base á epidemia recente de ébola.
Nos encontros tamén poderemos dar conta dos achados de Navantia a
prol da comodidade e a seguridade na navegación (mitigación do
ruído de banda larga radiado polas hélices) e dos traballos levados
a cabo por un equipo de investigadores do Instituto Tecnolóxico de
Matemática Industrial (ITMATI) no ámbito do modelado e a simulación
numérica de grandes masas de xeo: un labor dirixido a predicir o
avance-retroceso de grandes masas de xeo, “o que podería
converterse nunha ferramenta eficaz para previr catástrofes
derivadas do aumento do nivel do mar en zonas costeiras como
consecuencia do desxeo”, segundo apunta Carlos Vázquez,
catedrático de Matemática Aplicada na UDC e director científico da
terceira edición destas xornadas.
En total, as xornadas
contarán con trece relatorios sobre as amplas posibilidades do
cómputo na nosa vida cotiá. Os encontros tamén contarán coa
participación de INTA, OTAN, ROIA, CUD (Marín), CAG e as empresas
Everis, Navantia, Aerial works e Iauditoría. Por certo que o xoves
12 ao mediodía está previsto que o CITIC
dea a coñecer, da man do seu coordinador Manuel González Penedo, os
seus proxectos recentes de transferencia de coñecemento e
valorización de tecnoloxías. Tamén é de salientar a participación
de Federico Pérez Dueñas, coordinador da Organización de Ciencia e
Tecnoloxía (STO) da OTAN, que ofrecerá unha radiografía do
funcionamento dos case 300 programas de ciencia e tecnoloxía que se
coordinan desde París, iniciativas de interese para a OTAN propostas
polos países integrantes, algunhas orientadas ao desenvolvemento de
novas plataformas, novos avións de combate, novas armas con menores
danos colaterais, etc, e outras centradas na creación de simuladores
para capacitar o mellor posíbel a un médico en combate, ou
envorcadas na prevención de ciberataques a calquera soporte civil,
industrial ou gobernamental.
Outro dos relatorios máis
agardados é o de Manuel Catalán, xefe do Servizo de Xeomagnetismo
do Real Instituto e Observatorio da Armada (ROIA) do Ministerio de
Defensa, quen exporá a estratexia científica de España nos lugares
máis fríos e hostís do noso planeta: o Ártico e a Antártida.
Trátase dunha batería de traballos de investigación básica
relacionados sobre todo coas Ciencias da Terra: traballos que atinxen
(por exemplo) ao seguimento da evolución do grosor da capa de ozono
ou á adaptación dos seres vivos a condicións climatolóxicas
severas, ou, tamén, á tectónica de placas. Entre os resultados
máis recentes, Catalán destaca os estudos sobre a estrutura da
cortiza terrestre no Mar de Bransfield, onde se atopan as dúas bases
antárticas españolas: Juan Carlos I e Gabriel de Castela.
“Obtivemos evidencias que amosan que o fondo do devandito mar está
a espallarse, o cal podería conducir á formación dun novo océano,
aínda que este extremo non é concluínte”, avanza Catalán.