As xornadas Cando Mario coñeceu a Clío converten a Historia en videoxogo
xoves, 9 de abril do 2015
Tirar
proveito da canle audiovisual, dos medios de comunicación e, en
definitiva, do progreso é unha boa táctica para dar a coñecer a
Historia (con maiúsculas) do noso pasado. É por iso que o Campus
de Ourense acollerá do 16 ao 23 de abril a terceira edición das
Xornadas
Cando Mario Coñeceu a Clío. Detrás
da organización deste evento atópanse a Delegación de Alumnos da
Facultade de Historia coa colaboración do centro, da Asociación de
Antigos Alumnos da mesma facultade e de El
8º Historiador.
“Este
ano celebraremos a terceira edición das xornadas, que cada ano van
consolidando a súa programación. Seguiremos na mesma liña de anos
anteriores de intentar difundir como se transmite a historia a través
dos medios audiovisuais, desde o cine e os videoxogos até os
cómics”, apunta David Morenza,
organizador da actividade xunto a Ángeles Coello e Xoel Díaz.
Desta volta, a maior parte das intervencións correrán a cargo de
estudantes da Facultade de Historia, aínda que tamén se convidou a
participar a alumnado doutros centros, tanto do campus de Ourense
coma de fóra del, salientando a participación de estudantes da área
de deseño.
En canto á programación
destas Xornadas Cando Mario coñeceu a Clío, dicir que comeza
o día 16 de abril coa celebración pola tarde dun torneo do
videoxogo Age of Empires II, para o que é preciso previa
inscrición.
O día 20 o xogo
Assassin´s Creed II, permitirá aos participantes facer un
paseo diferente e virtual pola Italia do Renacemento (Florencia e
Venecia).
Completa esta
programación unha demostración de esgrima antiga que terá lugar o
día 21 de abril.
Os días 22 e 23 celebraranse o resto das
xornadas cun amplo programa de conferencias sobre xogos, videoxogos,
xogos de rol e series de televisión de carácter histórico.
Marián Ferro será a
encargada o día 22 de abranguer a serie de TVE Isabel,
baseada na vida da raíña Isabel I a Católica. Na súa intervención
tentará responder á pregunta de se se trata dun recurso histórico
ou é só lecer. Patricia Valle, Yira Calvo e Antonio Rodríguez
falarán do xogo de rol Ordalía e do uso nel da historia.
Pola súa banda, David Morenza presentará unha conferencia na que
explicará como estudar Historia a través dos videoxogos.
Para rematar, o día 23
Alberto González falará sobre a historicidade das campañas de Age
of Empires II e Pablo Rodríguez sobre a serie Hispania.
Asemade, haberá un espazo para a presentación de pósters.
As sesións
desenvolveranse no salón de actos do Edificio de Ferro e para
asistir a elas non é preciso inscribirse con anterioridade.