As webs de Pontevedra, A Coruña e Ourense, as máis transparentes da nosa terra
xoves, 2 de febreiro do 2017
As webs dos concellos de
Pontevedra,
A
Coruña e Ourense
veñen de ser recoñecidas por Dyntra
(entidade encargada de avaliar a transparencia e a rendición de
contas das diversas institucións estatais) como as máis
transparentes dos gobernos locais da nosa terra. As distincións,
materializadas en cadanseus diplomas, foron dadas a coñecer onte en
Santiago, no transcurso
dunha xornada sobre transparencia pública na Comunidade.
Na elaboración do informe que serviu de
alicerce aos recoñecementos (o índice DAM) tamén traballou a
asociación Transparencia Pública. As
entidades responsábeis do estudo certificaron que o nivel de
transparencia de Pontevedra e da Coruña é a día de hoxe do 67%, en
ámbolos dous casos. Na xornada participou o alcalde ca Coruña,
Xulio Ferreiro, e máis o rexedor da cidade do Lérez,
Miguel Fernández Lores. Tamén estivo
presente Jesús Vázquez, alcalde de Ourense, a segunda cidade da
listaxe (tendo en conta o empate das dúas primeiras).
Ademais de agradecer este diploma, o rexedor de
Pontevedra dixo que para el a transparencia “é moito máis que
os índices publicados no web”, xa que o Goberno de Pontevedra
“non é agora máis transparente ca antes”. Na súa opinión,
os novos instrumentos web permiten unha maior facilidade para acceder
aos datos, porén, “en ningún caso a transparencia é un
antídoto contra a corrupción, como algúns sosteñen”.
Pola súa banda, o alcalde coruñés informou
dalgunhas das medidas impulsadas polo Executivo local para “abrir o
coñecemento da xestión municipal á cidadanía e de cara ao
rendemento de contas”. Estas medidas, dixo, abranguen cousas como a
inclusión de membros dos grupos da oposición na Xunta de Goberno
local e na mesa de contratación, a retransmisión en directo dos
plenos ou a recente posta en marcha dun portal web transparencia do
Concello, “no que a cidadanía pode acceder de forma sinxela á
información relacionada coa xestión da institución local”.
A maiores, Jesús Vázquez agradeceu o premio
entregado á cidade de Ourense, deixando constancia de que “cando
se trata de falar de transparencia non estamos descubrindo nada novo:
a transparencia non debe ser o mero cumprimento dunha lei concreta,
senón unha actitude para establecer as mellores relacións cos
veciños”, dixo.
Pontevedra e A Coruña encabezan o ranking
galego seguidos de Ourense, Vigo, Lugo, Ferrol e Santiago, nunha
relación de 33 concellos de máis de 15.000 habitantes que pecha O
Porriño.