As webs das universidades españolas suspenden en accesibilidade
venres, 15 de outubro do 2010
Hoxe en día, se unha universidade con certo prestixio (ao igual que
calquera outra entidade pública ou privada) desexa darse a coñecer e mostrarlle
ao mundo, concretamente aos seus potenciais alumnos e alumnas, a calidade dos
seus servizos, plans de ensino e instalacións, debe contar, case
irremediablemente, cunha web funcional e atractiva que reúna nun mesmo espazo
virtual a información de interese para calquera público obxectivo.
Para isto, non chega con estar na Rede a disposición do gran público e
conformarse con “cumplir” con el, senón
que tamén hai que ter en conta ás persoas dos colectivos máis desfavorecidos á
hora de acceder ás TIC, como por exemplo as persoas con discapacidade (que é o
que nos ocupa neste artigo), e facer a web o máis accesible posible.
Isto, que a primeira vista pode parecer o normal, non ocorre en tódalas
universidades nin entidades públicas, e no noso país, malia que avanzamos moito
en materia de accesiblidade en liña, aínda nos queda un bo camiño por percorrer
a xuízo dos responsables do Informe de
Accesibilidade de Portais web Universitarios.
Este estudo, que analiza o cumprimento dos criterios de accesibilidade
nun total de 16 páxinas web de outras tantas universidades españolas e a súa
evolución dende febreiro de 2006
a maio de 2010, indica que “en comparación cos estudos realizados en 2004 e 2006, o cumplimento dos
criterios mellorou”, “se ben –engaden- só catro portais da mostra estudada superan
o 50 por cento do éxito de cumprimento”.
En concreto, as webs con maiores niveis de accesibilidade, e polo tanto
cualificadas como sitios web moderadamente accesibles son, nesta orde, a das
Universidades do Ministerio de Educación (81 por cento de cumplimento) e a da
Universidade Complutense de Madrid (cun 72 por cento).
Séguenlle a Universidade do País Vasco (55 por cento de accesibilidade) e
a Universidade de Barcelona (54 por cento).
O resto das webs estudadas non superan o 50 por cento do cumprimento dos
criterios de accesibilidade, o que supón, segundo o informe, “que ofrecen un nivel de accesibilidade
baixo, con bastantes dificultades e barreiras de acceso aos contidos para as
persoas con discapacidade”.
A web da USC, a única universidade galega analizada neste estudo, non
supera o índice marcado por só 6 puntos, xa que os seus niveis de
accesibilidade sitúanse nun 44 por cento, porén é das máis altas entre as “suspensas”.
O informe, realizado por Technosite por encargo da Fundación ONCE, foi elaborado
tendo en conta unha serie de criterios como a descrición de imaxes, o
etiquetado de formularios, o uso de marcos, código, encabezados, contraste de
cor…