As tecnoloxías que combateron as consecuencias da pandemia centran as Xornadas de Innovación Docente da UDC
mércores, 26 de maio do 2021
Máis
de 200 docentes da Universidade de Coruña están estes días a
compartir experiencias tecnolóxicas ligadas á pandemia na
quinta edición das Xornadas de Innovación Docente que organizan o
CUFIE e a Vicerreitoría de Planificación Académica da UDC. A
nova convocatoria superou as anteriores edicións en participación e
número de comunicacións presentadas. As novas xornadas comezaron (a
vertente asíncrona) o 16 de maio e inclúen 60 vídeo-comunicacións
nas que o profesorado presenta novas oportunidades ou explica o
aproveitamento formativo das ferramentas telemáticas postas en
marcha no curso da pandemia.
A
UDC confirma, de feito, que a maioría dos temas que se están a
tratar están influídos pola reconversión da docencia presencial en
virtual obrigada no pasado curso. Cuestións como por exemplo a
creación de laboratorios virtuais, o uso de redes sociais para a
aprendizaxe de idiomas (ou para concienciar sobre distintas
problemáticas socio-sanitarias), a gamificación da
aprendizaxe, as aulas invertidas ou o deseño de utensilios
vencellados á COVID-19 son algunhas das experiencias que se están
compartindo estes días en sesións asíncronas.
Esta
nova edición ten como obxectivo principal, segundo explica a
vicerreitora de Planificación Académica e Innovación Docente,
Nancy Vázquez, “poñer en común as experiencias de adaptación da
docencia ao medio virtual por mor da situación excepcional provocada
pola pandemia”.
Este
27 de maio ás 9.30 horas, o reitor Julio Abalde inaugurará (tamén
de forma virtual) a vertente síncrona das xornadas xunto coa
vicerreitora de Planificación Académica e Innovación Docente,
Nancy Vázquez, e o decano da Facultade de Ciencias da Educación,
Manuel Peralbo. A continuación, a directora do eCampus da
Universidade de Deusto, Sonia Arranz, impartirá a conferencia
plenaria Claves da docencia en contextos de pandemia e retos de
futuro. A mañá rematará con distintas mesas redondas nas que
se poñerán en común as experiencias presentadas e responderanse as
cuestións formuladas polos asistentes.
As
xornadas síncronas continuarán o día 28 de maio con diversos
obradoiros nos que os participantes aprenderán traballando
colaborativamente na resolución dun reto relacionado coas seguintes
temáticas:
-Dinamizando
as nosas clases virtuais síncronas. Thais Pousada e Laura Nieto.
-Deseñando
materiais didácticos accesíbeis. Iago Pérez
Santalla.
-Diversificando
a avaliación. Juan Carlos Brenlla.
-Guión
audiovisual para vídeos educativos. Manuel García Torre
Esta
quinta edición rematará coa entrega dos Premios Mellor experiencia
docente na UDC. Concederanse dous galardóns, o primeiro será un
xurado formado por expertos alleos á Universidade da Coruña, o que
elixa a proposta gañadora, e un segundo premio no que será o
público participante quen decida cos seus votos a mellor
experiencia.