As tecnoloxías que cambiarán o mundo centraron un novo encontro de APD en Santiago
xoves, 31 de outubro do 2019
- Alberto Núñez Feijóo na inauguración da xornada organizada por APD no Auditorio Abanca de Santiago
Este
mércores 30 celebrouse en Santiago, no Auditorio de Abanca, a
sexta edición de O Mundo que Vén, xornada de debate e
información arredor das novas tendencias tecnolóxicas que organiza
regularmente a Asociación para o Progreso da Dirección (APD), desta
volta coa colaboración da Xunta e o Círculo Financeiro de Galicia.
A cita foi inaugurada polo presidente da Xunta, Alberto Núñez
Feijóo, quen salientou a importancia de termos sempre vivo o
espírito innovador, “especialmente no sector produtivo
tradicional, no industrial e na biotecnoloxía”. Segundo fixo
saber, “o novo mundo laboral require unha adaptación formativa”.
A apertura das sesións tamén contou coa presenza de Enrique Sánchez
de León, conselleiro director xeral de APD.
Nas
diferentes sesións participaron Andreu Vilamitjana, director xeral
de CISCO, José A. Ondiviela, director de Solucións de Cidades
Intelixentes de Microsoft para o occidente europeo, Erik Häggblom,
director executivo de Tribaldata e Alumni de Singularity University,
Mikel Diez, responsábel de Innovación Tecnolóxica e Deseño en
IBM, Erik Häggblom, director executivo de Tribaldata, Nuria Alonso,
directora de Transformación Dixital de Hijos de Rivera, Virginia
Lavín, directora de Retina El País, Alejandro Pociña, presidente
de Steelcase, ou o especialista en Economía Antón Costas.
Un
dos fíos argumentais da cita foi a necesidade de xuntar forzas e
intercambiar coñecemento para sabermos anticipar tendencias
tecnolóxicas e contar coa maior cantidade de certezas a respecto
desta anticipación. Esta idea, que serviu como título do acto, foi
tratada durante toda a xornada, ben a través de tendencias
tecnolóxicas, tendencias na forma de manexar e desenvolver a
actividade empresarial ou mesmo con tendencias na xestión do talento
ou no uso dos datos.
A
velocidade crecente á que se producen estes cambios en innovación
centrou algúns dos diálogos que se puideron escoitar durante a
xornada. “O prazo no que se producen novidades que marcan un antes
e un despois na liña de progreso reduciuse a tres anos. No futuro,
non só non seremos prescindíbeis, senón que cada vez seremos máis
útiles e humanos. A cultura é tan importante como a tecnoloxía”,
sinalou Andreu Vilamitjana.
Antón
Costas rematou deste xeito o seu relatorio: “O contrato social da
empresa ten que adquirir unha nova dimensión. Xa non abonda con
falar de RSC, temos que falar da responsabilidade tecnolóxica da
empresa. Se utilizamos a tecnoloxía para destruír emprego, no canto
de mellorar a situación dos nosos empregados, gustaríame ver como
serán as sociedades dentro de dúas décadas. A empresa é un
propósito de longo prazo que ten que incorporar a todos”.