As redes sociais cobran importancia nas campañas electorais
luns, 2 de maio do 2011
- Fotografía de Iván Puentes publicada no DUVI
As redes sociais
son ferramentas que, mentres a algunhas persoas lles rouban tempo de traballo e
estudio e interrompen a súa concentración na actividade que estén a desenvolver,
a outras persoas resúltanlle de gran utilidade sobre todo á hora de desenvolver
o seu traballo diario.
Unha destas
persoas é Iván Puentes, actual alcalde de Fene e antigo alumno da Universidade
de Vigo, que se achegou a súa antiga facultade de Ciencias Sociais en Pontevedra
para transmitirlle aos alumnos de Publicidade e RRPP a importancia que están a
ter as redes sociais na súa actual campaña electoral e mandato.
Durante o seu
relatorio Iván Puentes explicou que “se
nas anteriores eleccións municipais petamos en cada unha das casas para chegar
individualmente a cada un dos 6500 veciños, esta vez intercambiaremos
impresións con cada cidadán grazas á posibilidade que ofrecen as redes
sociais”.
Iván Puentes é o
alcalde máis mozo de Galicia e un dos máis mozos de España, polo que non é de
extrañar que bote man das novas tecnoloxías para levar a cabo a súa actividade
diaria e a súa comunicación co electorado.
Na súa
intervención destacou a inmediatez e a bidireccionalidade que lle ofrecen as
redes sociais no seu labor ao mando do Concello de Fene, malia que desmitificou
o uso das redes sociais aclarando que “non
son unha fórmula máxica que, por empregalas, se vaian a gañar as eleccións”,
afirmou.
Os alumnos e
alumnas de Publicidade e Relacións Públicas coñeceron da man de Iván Puentes
algunhas das claves sobre o emprego da comunicación 2.0 nunha campaña electoral
dun municipio galego, así como o uso correcto de Facebook para darlle unha boa
imaxe á alcaldía baseada na transparencia (cousa non doada por certo).
O Diario
da Universidade (DUVI) relata que o
alcalde de Fene subliñou a necesidade de que toda a estratexia comunicativa 2.0
deseñada para un candidato “non debe ser
inventada para o momento”. Xa que logo, apuntou que “un perfil en Facebook soamente funcionará se o candidato certamente
vive na rede social, que o empregue para política pero tamén no resto da súa
vida”. Se non é así, “os perfís na
Rede perderán a súa esencia e a xente non o verá como cribles, porque de feito,
non o son”.